Les gjerne også Vottelaugets fellesblogg:

16. desember 2014

EIN SKATT TIL DEG I SKOGEN? - treasures in the fairy forest?

 Så reiste dei i lang tid og gjennom mange land, og kongsdottera visste slett ikkje kvar det bar av, men langt  om lenge kom dei til ein gullskog. Han var så gild at gullet draup av han, og tre og greiner og blomar og blad var av berre gull. (frå eventyret Kari Trestakk)

Her som eg skal feire jul i år, er det ikkje eit einaste snøfnugg i sikte. Men trøysta er då at nokre av trea enno viser seg i fine, gylne haustfargar.

Dei to nyaste vottemønstera mine er ei helsing til magiske vekster: Grantreet (etter historia til H. C. Andersen) og Eventyrlauv, som begge er med den nye e-boka "Flere votter fra eventyrskogen".


Oppdatert 21. des: På fellesbloggen til Vottelauget kan du sjå fleire foto, og lese meir om Eventyrlauv-mønsteret

Der står det også kven som fekk det ferdigstrikka Eventyrlauv-paret, pluss to andre vottar som eg gav vekk i førjulsgåve.





14. desember 2014

FRISLEPP AV REV - Mrs Fox and her mitten family

Det er så moro å sjå dei ulike variantane av mønsteret mitt Reveenka - som dukkar opp både på Raverly, på bloggar og i e-postkassa mi, og her har eg laga ein virtuell adventskrans med nokre av dei (med originalane mine midt i). Hjarteleg takk til alle for lån av foto!

Samtidig kan eg røpe at vi i Vottelauget rugar på ei heilt ny e-bok, "Flere votter fra eventyrskogen", og går alt etter planen, publiserer vi denne allereie no på tysdag 16. desember. Har du lyst til å vinne eit eksemplar, kan du gå inn på fellesbloggen vår og kommentere - der ser du også eitt av dei to nye vottemønstera mine, og kan gjette på eventyr!

8. desember 2014

MOLTER & MISTELTEIN cloudberry & misteltoe-mittens

No er eg klar for julekvelden - nesten! Med desse nystrikka vottane har eg både molter (som er min favorittdessert i jula), og misteltein.

Eg har nemleg leika meg med eigne fargar med utgangspunkt i Blåbærskogen av Wenche Roald. Endeleg fekk eg også tid til å prøve meg på dette fine mønsteret, lenge etter vi i  Vottelauget fekk sjå det første utkastet i sommar.

Oppskrifta står i e-boka vår "Votter fra eventyrskogen", og no i helga publiserte vi også den engelske versjonen (eit lite julegåvetips her, ja!) - og der heiter mønsteret Blueberry land. 

Og no har eg fått smaken på endå fleire moltevottar! Men eg er på jakt etter "den ultimate moltefargen". Har nokon eit godt tips ...? "Okergult" i Ask Hifa er ein fin farge, men er  litt for lys og solskinnsgul til å vere molte, synest eg. Eg har funne eit lite, knalloransje nøste med mohairgarn frå Pickles/Telespinn - kanskje blir dette ein del av neste moltevott? Eller kanskje soppfarga finsk sauegarn frå Riihivilla kan vere noko?

Strikkefakta, Moltevott & Mistelteinvott:
etter oppskrifta: "Blåbærskogen" av Wenche Roald (Raverly)
garn: Ask/Hifa 2
pinnar, Moltevott: 3 mm
pinnar, Mistelteinvott: 3,5 mm
størrelse: Dame medium
fleire detaljar: 

29. november 2014

LYSANDE MASKER - shining stitches

Kven er det som sit der inne i varmen, medan snøfnugga dansar utanfor? Då eg bladde over til november i Kittelsen-kalenderen min, kom dette lysande biletet fram. Desse fargane ville eg også fange inn, i masker!

Og sanneleg: I fargepaletten til Holst Garn (Supersoft) var det full match med Kittelsen. Men istadenfor å strø endå meir pengar ut på nytt garn, bestemte eg meg for ta av Shetland-nøsta som allereie fanst i huset: "Marsipan" og "Brandy" frå Malsen og Mor, og "Coffee" frå Holst Garn  - litt av ein mektig mix å setje fram på bordet!


Og her er mørketid-skjerfet mitt, sånn cirka halvvegs. Eg hadde eigentleg planlagt eit enkelt skjerf med berre éin mønsterbord nedst på kvar side, og lettstrikka lus/snøfnugg på resten. 


Men det var så moro å prøve ulike variantar av mønsterborden, og då oppdage at både blomster, lauv og sommarfuglar kom fram, alt etter samansetjinga. Fargen Marsipan såg f.eks. temmeleg blass og beskjeden ut åleine, men på ein botn av mørkebrun kaffi lyser han verkeleg opp. 

Så kjære, lange mørketid: Istadenfor å forbanne deg, omfamnar eg deg med dette vesle skjerfet. Og vonlegvis blir det ferdigstrikka før våren kjem!

Merknad: 
Biletet "November" frå Aarets Maaneder (1890) av Theodor Kittelsen 
er henta frå wikiart.org (public domain)






7. november 2014

VOTT OG SINGELLIV - single mittens

Finst det ei moralsk lov som seier at vottar passar best som par? I tilfelle er eg ein notorisk lovbrytar. Eg går skamlaust rundt i byen med umake vottar, og no er dette syndige livet faktisk i ferd med å bli ein vane - som eg likar!

Kva med deg? Har du mange single vottar i skapet? 

Eg unnskyldar meg med at eg er ein del av "Eventyrlige votter"-teamet, der vi har teststrikka og eksperimentert både dag og natt. Då er pliktstrikk av vott nr 2 den store bøygen, for det er så moro å berre leike vidare, med andre fargar og nye garnsortar! 


Difor må eg innrømme at barnevottane "Bukkene Bruse", som eg teststrikka for Knitnetty/Wenche Roald, enno ikkje har fått matchande partnerar. Men eg var smart nok til å strikke éin høgrevott, og éin venstrevott, difor kan dei faktisk brukast allereie no, med hopp og sprett! 

Og dette er også mitt beste vottestrikk-tips: Gidd du ikkje å strikke ein maken vott med det same, så strikk i alle fall den neste for motsett hand! Vips, så har du eit vottepar klart når vinteren kjem.
Og Nøkken i blå lamull ser faktisk temmeleg fornøgd ut, sjølv om partneren er blodraud og full av hårete alpakka? 

Desse barnevottane teststrikka eg for Monstermønster/Merete Jansvik Toft, og å kunne spreie lusa fritt og uhemma som her, var herleg frigjerande! Slik blir faktisk ingen Nøkken-vott lik dei andre, uansett.
Og kva med desse tre single Reveenka-vottane i Tumi? Får dei nokon gong møte tvillingsjelene si, skal tru ...? PS: På prosjektsida til Reveenka på Raverly står fleire fakta om desse tre nye variantane mine.


Oppdatert 18. november: Det kan faktisk også lønne seg å strikke single vottar! Vi i Vottelauget delte impulsivt ut singelvott-prisen som ein av ekstrapremiane i den eventyrlege konkurransen vår, berre sjå her. (Og, ja - eg var med i juryen :-) Og her er blogginnlegget til Babben/Barbro, som vann denne prisen med ein vakker og lilla "Eventyrblomster"-vott!



23. oktober 2014

TREKNING ... OG TRØYST giveaway & new chances

Antrekket måtte sjølvsagt vere i orden då vi skulle trekkje vinnaren av Reveenka-garnet! 

Men før eg røper namnet, skundar eg meg å tipse om at det kjem fleire sjansar, både til å vinne e-boka vår "Votter fra eventyrskogen", og ulike garnpakkar som passar til. Sjå berre her, på fellesbloggen vår: Eventyrlige votter.

Eg fekk så mange fine og spennande kommentarar til loddtrekninga! Hjarteleg takk til alle! 

Og sidan desse nesten var like mange som talet på veker i året, klipte eg i ein gammal kalender for å ha med alle tala.

Vinnaren vart nr 33, hkangora/Heidi Kim (blogglenke)! Heidi Kim skreiv dette:

Har aldri strikket votter før, men nå må jeg snart i gang. Flott bok og mye inspirasjon :) O jeg 
skulle være så heldig å vinne, ønsker jeg meg Tumi pakken :)


Gratulerer, Heidi Kim! No treng eg berre postadressa di!

Peer Gynt-pakken får vente på ein annan vinnar, seinare!


18. oktober 2014

VINN GARN TIL DYRISKE VOTTAR - foxy yarn kits

Mønsteret Reveenka er mitt bidrag til e-boka Votter fra eventyrskogen. No kan du strikke dine eigne dyriske vottar, om du har lyst! Eg har sett saman to ulike garnpakkar (yarn kits), og du kan vinne éin av desse!

Peer Gynt-pakken til høgre: Denne pakken har nok garn til originalfargane i herremodellen av Reveenka (pluss raudt), men sjølvsagt kan du også bruke garnet både til dame- og barnevottar. 

Tumi-pakken til venstre: Tumi er det nye garnet frå Rauma, like tynt som Finullgarn, men er ein mix av 50 % ull og 50 % alpakka (dvs ein tynnare versjon av Mitu). I denne pakken er det meir enn nok garn til eit par damevottar med enten oker, kvitt eller raudt som botnfarge, pluss mønsterfargane. Eller om du vil: strikk barnevottar eller herrevottar! 

Alt garnet er frå mitt eige lager etter den store strikkesjauen i sommar, då eg dikta fram Reveenka, i tre ulike variantar: Dame- og herrevottar i Peer Gynt-garn, og barnevottar i Tumi. Mønsteret kan varierast i det uendelege, og du kan sjonglere både med diagram, fargar og garntype.


Tips: Inne på fellesbloggen Eventyrlige votter har eg i dag lagt inn ein aldri så liten foss med foto rundt dette vottemønsteret, og også fortald meir om historia bak. Der avslører eg også nokre av dei nye Reveenka-variantane som eg strikkar på akkurat no. 

Men vil du prøve å sikre deg ein garnpakke i den originale fargepaletten, må du leggje igjen éin kommentar her hos meg, altså rett under dette innlegget. Skriv kva for ein av dei to garnpakkane du helst ynskjer deg: Peer Gynt eller Tumi? Og om du vil: Fortel gjerne om ditt forhold til vottar. Strikkar du mange?  Kven strikkar du helst til? Eller har du aldri strikka vottar før? 

Kommentaren din må vere her seinast tysdag (21. oktober) før midnatt. Deretter trekkjer eg tilfeldig mellom alle som har kommentert. Det er berre éin vinnar. Garnpakken som då blir til overs, vil eg spare til ei ny loddtrekning  seinare i haust!

14. oktober 2014

VOTTEBOKA VÅR ER HER! - our mitten e-book is published

Ja, no har eg snudd primstaven min til vintersida! Der er det første symbolet ein vakker vott, dermed kan vi i Vottelauget i endeleg opne e-boka vår for heile verda!

Mitt bidrag til "Votter fra eventyrskogen" er tre ulike variasjonar over Reveenka (sjå under). Seinare i veka kjem eg til å vise fram endå fleire foto, og fortelje meir.

Men allereie i dag kan du sjå foto av alle dei sju ulike vottemønstera på
fellesbloggen vår, Eventyrlige votter. Sjølve e-boka er til sals via Raverly. Denne vinteren kjem i alle fall ikkje ég til å fryse på hendene! 


Reveenka: her er lenke til mønsteret på Raverly.

9. oktober 2014

HEMMELEG SOMMARSTRIKK - summer secrets in a jar

Sjølv om eg ikkje blogga så mykje i sommar, strikka eg desto meir. Men då var alt temmeleg hemmeleg. 

Kva for historier dette Norgesglaset skjuler, kan du lese meir om på bloggen Eventyrlige votter, for om nokre få dagar kjem e-boka eg har vore med på å lage!

10. september 2014

STRIKKE-TREFF MED YSOLDA - in Hamburg with Ysolda



Denne helga har eg lært meg å manipulere! Eg reiste til arrangementet Wollfest Hamburg, og fekk som ei av tjue heldige vere med på workshopen til Ysolda Teague: "Manipulating Stitch Patterns".

Ysolda frå Skottland sjonglerte og sjarmerte, og viste oss korleis vi kan lage eigne strikkedesign med klassiske hol- og flettemønster som utgangspunkt. Alt såg leikande lett ut då ho klipte og limte, strekte og  drog i diagramma på PCen. Eg diggar unge damer som henne når ho seier at ho elskar matematikk! 

Ho hadde også med seg ein fin bunke bøker til inspirasjon (m.a. av Barbara Walker), og med nyinnkjøpt, økologisk garn frå det tyske firmaet Rosy Green Wool valde eg meg ut ei japansk mønsterbok, og prøvde å  kombinere eit holmønster derifrå med ei tradisjonell flette. Ysolda kunne også vise meg og dei andre at det ikkje er noko problem å lage fine fletter sjølv om du har lagt igjen flettepinnen heime. Ysolda forklarar også trikset her.


Medan vi i gruppa sat fordjupa med kvar vår vesle, einsfarga prøvelapp, brukte Ysolda (sjølvsagt) ventetida til å strikke. Dette funklande fairisle-mønsteret skal bli til ein vest, fortalde ho. Men korleis fungerer eit slikt strikkebelte frå Shetland,  med rundstrikk på tre lange strømpepinnar ...? På heimesida hennar fann eg denne videoen med forklaring.

For meg som for det meste sit heime i sofakroken med strikket mitt, var dei i tre timane i lag med Ysolda Teague og dei tyske strikkedamene som ei god vitamin-dose no når hausten nærmar seg. Ysolda er hyggeleg og jordnær som "the girl next door", samtidig som ho er ein skikkeleg proff i faget sitt. 


Og då vi kom ut frå workshopen var strikkestjerna Stephen West  i full gang med å posere for fotografane. "Dansepartneren" i midten er handspinnaren Chantimanou, som tilliks med Stephen West også heldt workshop på Wollfest Hamburg


Medan mange av dei andre gjekk heim frå Wollfest Hamburg med bæreposane fulle av Wollmeise og Madelinetosh, var eg så nøktern (og fortumla?) at eg berre kjøpte desse tre beskjedne nøsta, pluss eit lite strikkehefte av Ysolda. Skal tru om det grønmelerte Shetland Spindrift-garnet er i akkurat same fargen som Ysolda har i fairisle-vesten sin? 

Om du vil sjå fleire foto frå  Wollfest Hamburg, kan du m.a. sjekke her, på bloggen til Tichiro (på tysk), på Wollfest-sida på Facebook og også her på Wollfest-tråden inne på Raverly. 

7. august 2014

BOMULL-BONANZA - cotton yarn give away

Gratulerer og hurra til Karoline Hopland og Lisbeth Severinsen! Begge får ein garnpakke kvar, flygande gjennom posten! (Trekninga utført 17. august.)

Bonanza: av spansk, eg. 'pent vær'; 
i overført betydning 'rikdom'





(Store norske leksikon)

Denne sommaren har eg snudd opp-ned på garnlageret mitt, og bestemt meg for at skal eg unne meg meir nytt framover, må eg gi bort noko først! 

Boksen som det står "Bomull" på hadde det tjukkaste støvlaget, og eg innser vel at eg er ei ulldame når det gjeld strikking. Kva med deg?
Eg har altså kledd på meg spandér-shortsen, og no har du sjansen til å få éin av desse to bomullgarn-pakkane gratis i posten frå meg! Alt er økologisk merka. 


Legg igjen ein kommentar her seinast 15. august, og skriv kva pakke du helst ynskjer deg - og gjerne også kva du kan tenkje deg å bruke garnet til. Dei to vinnarane blir uansett valde ved loddtrekning. 








Pakke 1 = Pickles Thin Organic Cotton i diverse fargar.
Eg har strikka fleire baby-smekker med dette garnet, og det 
fungerte glimrande. Elles har eg laga desse fuglane her.

Vinnar av pakke 1:
Karoline Hopland











Pakke 2 Pakucho & Debbie Bliss ecobaby pluss litt til. 
Eg har blogga om Pakucho-garnet tidlegare, og strikka ein spretten harepus. 



Vinnar av pakke 2:
Lisbeth Severinsen

(trekning av begge 17. august ved hjelp av Random Number Generator)







25. april 2014

KYKELIPI - singing swatches


Pip-pip-prøvelapp!
Det kvitrar og syng, både ute på greinene, og inne på strikkepinnane mine for tida! Eg har fått dilla på fuglemønster, ikkje minst etter at eg laga det lange "Lerka"-skjerfet tidlegare i vår. 

Eigentleg er eg enno berre på prøvelapp-stadiet ( ... til ei hue kanskje, eller ein barnegenser ...?) men eg er så gjerrig på garnet - og på tida mi - at eg fann ut at eg ville bruke desse prøvelappane til noko nyttig. 

Dermed har eg plutseleg fått meg fleire par pulsvarmarar og ein godteri-skjular!


Godteri-skjularen (som eigentleg er mønsteret til tuppen på ein estisk vott) vart testa ut no i påska, og innhaldet fall i alle fall i smak! 

Denne tuppen kan kanskje også brukast som eggevarmar?


På desse mini-pulsvarmarane (med safran-gule kantar) har det norske "Lerka"-mønsteret fått selskap med eit estisk fuglepar. Eg fann fram mine tynnaste strømpe-pinnar til testen: 1,5 millimeter! 

Estland har så mange stilige mønster, og ikkje minst uvante og spreke farge-kombinasjonar! 

Då eg oppdaga den fine bloggen til Ülle frå Estland, og spurte henne om informasjon om gamle vottemønster, delte ho raust frå samlinga si på e-post. Seinare kom også eit nydeleg lite hefte, berre med fuglemønster, rett i postkassa til meg! "Muhu Linnud" er som ei lita diktbok å bla i, til dagleg inspirasjon! 
Ideen til desse påfugl-pulsvarmarane derimot, fann eg i den svenske boka "859 fåglar". Boka/heftet er berre i svart-kvitt, heilt utan tekst, og er ikkje så poetisk laga som "Muhu Linnud", men er fullstappa av fuglemønster (ja! 859 stykk!), henta frå gamle broderi, vevnader og strikk rundt om i verda.

Eg har altså samla meg eit fint lite "reir" med fuglemønster, og er berre så vidt i gang med ruginga (les: strikkinga)! Denne våren blir det meir fuglestrikk, ja! Har du eit favoritt-fuglemønster?


    1-2-3-4
    kykelipire
    5-6-7-8
    kykelipotte
    9-10-11-12
    kykelipoll
    12-11-10-9
    kykelipi

"Kykelipi" av Jan Erik Vold (1969)

Garn brukt til pulsvarmarane:
Shetland soft (frå Malsen og Mor), Supersoft (frå Holst Garn) og Tvinni (frå Isager)


16. april 2014

HUE-SPRÅKET - talking hats

Utan å vite det har eg lage ei sjekke-hue for påska! Då eg hadde festa trådane på første heilgrøne hua eg har strikka nokonsinne, kunne eg nemleg lese dette på nett-nyheitene: "Ingen spøk å gå med grønn lue" (nrk.no)

Det som starta som ein april-spøk, er no blitt eit meir eller mindre seriøst turtips frå Turistforeningen. Eg noterer: "Skal du på fjellet i påsken? Husk å ta med grønn lue hvis du er singel, rød lue hvis du er opptatt og oransje eller gul lue hvis du kanskje er åpen for kontakt."

Ok! Eg har faktisk heile denne "relasjons"-paletten klar! Var det underbevisstheita som arbeidde for meg ...? For det er vel ingen som no trur meg når eg seier at eg rett og slett berre likar å lage einsfarga huer i struktur-strikk? Men heldigvis, fargane stemmer: 6-åringen er singel, ok - det blir grønt! Og 4-åringen er open for kontakt, ja! Det blir gult! 

Uansett, vi skal ha bypåske i år, langt borte frå snøfnugg og skiløyper, 
så eg veit ikkje om det same hue-språket gjeld her nede på flatmark? 

Kva farge skal du ha på hua di i påska? 
Eg trur eg skal strikke meg ei ny hue, og den skal vere blå!
Snakkande huer: Betyr dette (frå venstre) opptatt, søkjande og singel?  Eller er det kanskje rett og slett skjult reklame for Kvikk Lunsj? Eller kanskje eit heimesnekra forsøk på trafikklys?
fakta, grøn hue:
garn: "Cheeky Merino Joy" frå firmaet Rosy Green Wool (økologisk)
farge: nr 054, Lucky Clover/Glücksklee (firkløver)
pinnar: nr 3
størrelse: tilpassa ein 6-åring, 
dvs la opp 128 masker
(originalen er dame-str)
total-vekt: 44 gram

lagt til 18. april:
fakta, raud hue:
oppskrift: "Candle flame hue" av Maisha (dansk, gratis)
garn: Artesano 4ply alpaca (100 % alpakka)
farge: nr 1532, Chile
størrelse: dame (eg la opp 100 m til kanten, auka til 160 m før flamme-mønsteret)
pinnar: 2,5 mm (kant) og 3 mm (mønster)
total-vekt: 48 gram

fakta, gul hue:
oppskrift: "Liam's Loops Hat" av Annina Päivärinta (gratis, via Raverly)
garn: Pickles Thin Alpaca (lagt dobbelt)
farge: Gurkemeie
størrelse: dame/stort barn
(dvs 4 repetisjonar av flettemønsteret i høgda.
Eg har også strikka ei hue med berre 3 repetisjonar, 
og det  vart ei barnehue str ca 4 år.)
pinnar: 4 mm
total-vekt: 65 gram
Topp-tur: Det er så moro å felle toppen på ei hue,
spesielt når det dannar seg så stilige mønster som her!

8. april 2014

SPINNEOLJE: GRØSS ELLER GREIT? - spinning oil, awful or alright?

Spinneolje-restar i garn, kva er dét ...? 
For ei god stund sidan trilla det første nøstet "Holst Supersoft" ut av postkassa mi, bestilt frå Danmark. Fargen var nydeleg og fint melert, men - nøstet lukta så rart? Og garnet kjentest så hardt og livlaust ut? Kvifor kalla dei dette då "soft"??? 

Eg sjekka på nettsida deira igjen, og las: "Bemærk: Garnet indeholder en lille smule spindeolie og leveres uvasket. Spindeolien forsvinder ved første vask."

Hm. Spinneolje? Eg fann ikkje ordet i den norske ordboka eingong! Og nøstet vart berre liggjande (eg trur eg faktisk eg gav det bort til slutt). Men samtidig med nøstet hadde eg bestilt det fantastiske fargekartet til Holst, med nesten 100 ulike fargar! Korleis kunne eg la vere å prøve igjen? Og så dukka Malsen og mor opp, med det like freistande Shetland soft - og allslags lekre ferdigstrikka plagg med denne garn-typen spreidde seg på norske bloggar.

Dermed sette eg ei klype på den fordomsfulle nasa mi, og bestilte fine fargenamn som "isfugl", "marsipan" og "eplekjekk". Men garnet lukta likefullt som ein sykkel-verkstad om våren, og var like hardt og livlaust som før. Så surfa eg ei stund og funderte, og bestemte meg for å prøve Monstermønsters Nøstevask!



Og sanneleg, det fungerte! Og nøstet vart ikkje "flokete" heller, sjølv om eg sentrifugerte det temmeleg grundig (på ullvask). Men lukta av spinneolje forsvinn likevel ikkje heilt, og garnet kjennest heller ikkje heilt "supersoft" ut for meg før etter minst to omgangar vask av det ferdigstrikka plagget (prøvelapp). 

Kva synest du om spinneolje i strikkegarn? Er det greit eller grøss? Eller kanskje elskar du nettopp denne overgangen når det ferdigstrikka plagget "blomstrar opp" etter vask? 

Eg er ingen spinneri-ekspert, så eg lurer på kvifor nokre garn blir selde med spinneolje, og andre ikkje? Er det eit kostnads-spørsmål? Og er det betre for miljøet at spinneria droppar denne ekstra vasken? (Det einaste eg har forstått som eit pluss med spinneolje i ferdig garn, er til bruk i strikkemaskin?)


Blir glad for alle gode svar og tips etter dette drysset mitt med spinn(e)ville spørsmål!
Eit nyvaska "Isfugl"-nøste i handa er betre enn
ti spinnville på taket! 


30. mars 2014

LERKENE JUBLAR - The Lark-mitten changed into a scarf

Dette er historia om den vesle votten som vart til eit skjerf. Eller kanskje til ein dekorativ klokkestreng? Eller til sovepose for eit slangemenneske ...? 

I alle fall kan i alt 32 lerker i ulike blå-tonar no flagre rundt halsen min når eg er ute og lengtar etter våren. Så eg trur eg kan kalle dette plagget eit ekte skjerf.

Det heile starta med at eg ville prøve meg på det gamle (norske?) vottemønsteret "Lerka", som Annepålandet skriv fint og nostalgisk om i blogg-innlegget "De aller, aller første".
Men då mansjetten var ferdig, var eg slett ikkje i humør til å gi meg i kast med ein tommel-kile, så eg bestemte meg for å berre konsentrere meg om fuglane, rundt og rundt. Og kalla prosjektet for "prøvelapp".

Samtidig fekk eg nemleg lyst til å teste ut kva som kunne vere det perfekte bakside-mønsteret til slike Lerke-vottar. Dermed vart det fleire og fleire runder, og fleire og fleire fuglar - nokre lyseblå, nokre mørkeblå, nokre oppned til og med - heilt til tolmodet sa stopp ved sånn cirka 120 centimeter. Då hadde eg altså 16 lerke-par og eit varmt og dekorativt (og kanskje litt merksnodig) skjerf! 





Å nei, eg høyrer lerka
for fyrste gong i år!
Ned frå ein vinterhimmel 
ho kved så kvat om vår.
Og dimt det er i lufta, 
og skodd har sola dult;
men den velsigna fuglen 
han kvitrar like fullt.

Anders Hovden (1895)






fakta, Lerke-skjerfet:
min eigen idé, men fugle-mønsteret er bygd på vottane
Lerka frå den norske boka "Votter og vanter" (1955)
(Eg endra diagrammet litt: 
m.a. er mine lerker bittelitt feitare og rundare, 
og tettare på kvarandre)
oppdatering 31. mars: 
boka "Votter og vanter" kan lesast på bokhylla.no via Nasjonalbiblioteket 
(men berre tilgang for norske IP-adresser) 
garn: 
mørkeblått med nyansar: Kauni farge "EL" (53 gram)
lyseblått: Pickles Pure Wool farge "isbre" (43 gram)
pinnar: 3 mm 
totalvekt: 95 gram
mål: 10 cm X 120 cm



Related Posts Plugin for WordPress, Blogger...