24. desember 2013

JULA ER STRIKKA INN - merry mittens

Klokkene kling, og eg har nettopp festa dei siste trådane på eit par   fuglevottar, som no skal pakkast inn til ei lita jente på halvtanna år.

I fjor rakk eg berre éi heimelaga julegåve, denne gongen vart det sanneleg meir.

Eg har planar om å blogge litt om desse strikke-sakene i romjula, 
om eg då ikkje drøymer meg heilt bort ...

Ei god jul, fylt av englesong og varme, ynskjer eg alle!



oppdatert med strikke-fakta (januar 2014):
oppskrift: "Liten fuggel" av Jorid Linvik
garn: Riihivilla "Velho"
pinnar: 2 mm
størrelse: 1-2 år (litt store)
total-vekt: 26 gram

13. desember 2013

HJELP FRÅ LUCIA? Knitting help from a Saint?

Adventslyset vårt er allereie nådd meir enn halvvegs, medan eg sjølv har ei laaang liste med uferdige prosjekt før jul ... Dei tynne bambuspinnane er utslitne og skeive  - men eit svensk mønster og herleg garn lokkar meg vidare. 

Skal tru om dette kan trylle seg om til ei julegåve i tide? Viss ikkje, er det freistande å bruke det fine rose-diagrammet som julekort! For det er tanken som tél, er det ikkje ...?

Vel, eg (og du?) får håpe på ekstra hjelp frå Lucia og andre gode krefter no i desember. Ikkje berre til strikking, men til lysare tider for alle i stall og stove. Og kven var Lucia eigentleg ...? Bloggaren Anne på landet (As Almanakk) skriv fint om dette i dag! 

8. desember 2013

BLOMSTRING I DESEMBER - flower mittens

Før helga sat eg væpna med nåler og saks og syntest bittelitt synd på meg sjølv: Eg skulle kjempe mot eit bustete vrangside-troll, nemleg feste eit kaos av maaaaaange tråd-endar. 

To vottar låg framfor meg, strikka med elleve ulike fargar - og eg hadde droppa alle gode råd om innveving eller "spit splicing" undervegs. Sukk. 

Men det varte ikkje lenge før eg måtte le av meg sjølv. For dette var ikkje noko kaos, det var eit herleg fyrverkeri av fargar - det var ein fest! 

Eg hadde vore så heldig å bli invitert som test-strikkar av torirot, no var eg på oppløpssida, saksa klipte av den aller siste tråd-halen, og eg kunne endeleg snu rettsida til. Og der falda Blomekrans-vottane seg ut i all si prakt! 



Denne test-strikkinga av mønsteret "Blomekrans" har verkeleg gitt meg ny næring og fargeglede, no midt i vinter-mørkret. Desse vottane lyser opp på frukostbordet like mykje som dei to adventslysa mine i dag!

Alt garnet er frå "my stash" som det så fint heiter, og no har eg lyst til å grave endå djupare i lageret, for å skape fleire farge-gleder. Hjarteleg takk, torirot! 

oppskrift & fakta:
(lenke til Raverly)
garn: 
botnfarge: Isager Highland, farge "Ivory"
... pluss 10 ulike mønster-fargar frå diverse reste-garn: 
sjå detaljar på prosjektsida mi på Raverly
pinnar: 3 mm (2,5 mm truleg betre )
størrelse: medium 
total-vekt: 41 gram


Takk for farge-festen! Skål! 


22. november 2013

VILL ELLER SNILL? - sheep-eating mittens


Jacha-chacha-chacha-chow! Eg klarte ikkje å la vere. Akkurat som Ylvis måtte eg lage nokre revestrekar ég også  - og resultatet ser de her: To par sjølvkomponerte vottar med villdyr på. 

Dette er bokstaveleg tala "ulv i fåreklær", for garnet til begge votte-para kjem frå snille (?) finske sauer. Nok ein gong har eg nemleg dukka ned i det herlege (... og stadig minkande ...) lageret mitt med plantefarga Riihivilla-garn 

Damevottane "Revar og rognebær" har dei rust-oransje nyansane sine frå blodraud kanelslørsopp og krapp, medan botnfargen kjem frå ufarga ull. På barnevottane "Ulvar i mosen" snudde eg om på fargane, slik at dei raude revane altså vart omskapte til gråbeinar! 

Eg har bevisst stilisert og forenkla, så på avstand ser det heile meir ut som abstrakte grafiske mønster, enn som glefsande rovdyr. 


Men uff, eg får nesten dårleg samvit! Tenk om dei stakkars sauene hadde visst at eg brukar den fine ulla til å lage portrett av deira verste fiendar! Men eg trur ikkje desse vottane skremmer verken Raudhette eller nokon annan i skog og by. 

Nei, revane og ulvane mine ser ikkje særleg skumle ut, heller som små kattungar. Men mjuke og varme er dei, akkurat som vottar skal vere.  
Wa-pa-pa-pa-pa-pa-pow! Kulda kan kome!



fakta, barne-vottane
"Ulvar i mosen"
med mønsteret frå reve-vottane mine 
... og elles barnevott-oppskrifta
størrelse: ca 4-6 år
garn: Riihivilla Aarni
fargar: restegarn frå reve-vottane mine, 
men omvendt farge-bruk
pinnar: 2,5 mm
total-vekt:  35 gram
revevottane "Revar og rognebær"/
Foxy mittens ("Foxes and rowan berries")

Sjå også: Prosjektside på Raverly/
Project page, Raverly

(oppdatering februar 2015: oppskrifta er fjerna herifrå bloggen,
og lagt til sal på Raverly for ein symbolsk sum på 5 NOK. Desse revevottane vart utgangspunktet for oppskrifta "Reveenka", som er publisert i e-boka "Votter fra eventyrskogen")

garn/yarn: Riihivilla Aarni
fargar/shades
botnfarge: "natural beige" (ca 47 gram)
mønsterfargar: 
tre ulike oransje- og rust-nyansar/three different selections of orange and red/rusty


8. november 2013

VOTTAR FRÅ SKOGEN - mittens from the woods

I dag har eg vore på skogstur med Svante og Doris! Dette er mine to nystrikka vottepar frå den svenske boka "Vantar för alla årstider".  Spesielt Doris lyste frimodig opp i grønt, raudt og gult, takka vere min uhemma bruk av nyansane i det finske garnet Riihivilla -  som er handfarga ved hjelp av sopp og planter. 
Og den djupe rosafargen til Svante kjem faktisk frå lus ...



No har samveret med Doris og Svante gitt meg votte-feber, og eg tenkjer fram mot jul og heimelaga julegåver. Kanskje er vottar ein god idé? 

Men kva mønster og fargar skal eg gi meg i kast med no? Og kva garn er best, spesielt viss eg vil strikke tofarga mønster a la Selbu i tynt garn? 
Og: finst den ultimate votte-boka ...
Eg blir glad for alle votte-verkstad-tips!


"Vantar för alla årstider", utgitt av dei to svenske bloggarane Clara Falk og Kamilla Svanlund, vart ein fin start på hausten for meg, men no er eg altså svolten på meir! Her er forresten Raverly-sida til alle dei 27 oppskriftene i bokaførebels har dei lagt ut fleire foto på Raverly enn på heimesida, ser eg.


SVANTE av Clara Falk
frå boka "Vantar för alla årstider"
garn: Riihivilla "Maahinen"
(er tynnare enn "Aarni")
i fargane "pink" (cochineal) 
og "natural white"
pinnar: 2,5 mm (betre med 2?)
størrelse: dame 
total-vekt: 63 gram
mine endringar: 
*einsfarga ribbestrikk istadenfor mønstra mansjett
*fugl på framsida av tomlane
* andre fargar og anna garn



DORIS av Clara Falk
frå boka "Vantar för alla årstider"
garn: Riihivilla "Aarni" 
(er tjukkare enn "Maahinen")
fargar: grøne, raude og gule nyansar,
sjå detaljar på Raverly-sida mi
pinnar: 2,5 mm
størrelse: dame (men vart store pga tjukkare garn enn i original-oppskrifta)
total-vekt: 93  gram
mine endringar:
* tova vottane lett temmeleg kraftig for å 
få dei mindre
* andre fargar og anna garn


Takk for turen, Svante og Doris!



31. oktober 2013

FINSK GODTERI - yummy yarn from Finland

Medan ekorna hoppar hektisk rundt i skogen og samlar nøtter, har eg leita fram mine godsaker frå sist vinter: Blodraud kanelslørsopp, gulrandkjuke, krapp og gul reseda. Men dette skal absolutt ikkje etast - men strikkast sjølvsagt! For endeleg er eg i gang med å nøste opp det handfarga Riihivilla-garnet (heimeside) eg bestilte då eg sat inne og fraus ein dag i februar.  

Det er som om heile den nordiske sommaren er fanga inn i desse små, lysande buntane, synest eg! Kvar av dei veg berre 20 gram, er alle litt ulike i nyansane, og luktar deilig av lanolin og frisk luft. For dette er rein, finsk saueull  (altså 100% suomenlampaan villalanka), handfarga av Leena Riihalä (blogg)med sopp og planter funne langs dei finske skogane. 

Og kva med puikkokoko ...? Det vil seie: kva er passande pinne-størrelse? Eg valde 2,5 mm! For no er eg i gang: 


Svensk oppskrift, finsk garn, norsk strikkedame: 
Eg måtte berre prøve ut alle Riihivilla-fargane - på éin gong! 
Oi, det vart kanskje litt for mykje av det gode ...? Om denne votten blir ferdig kjem han i alle fall til å lyse opp i vintermørkret!


PS: Ikkje gløym direktesendinga 
Nasjonal strikkekveld- & natt på NRK2 (nett-tv)
i morgon, fredag 1. november frå kl 20.05,
med oppstart i "Norge rundt" på NRK1 kl 19.40. 
Meir info m.a. her (nrk.no)

27. oktober 2013

VOTTAR TIL PRINSEN - mittens for a prince

Eit lite vottepar i handa er betre enn ti ubrukte garnnøste i skapet (nytt ordtak)
Eit par fjørlette vottar i silkeull er no ferdige, og kan pakkast inn som dåpsgåve. Nei, ikkje til George Alexander Louis of Cambridge, men til ein annan nydeleg, liten gut. Og uansett, alle barn som kjem til verda, er prinsar eller prinsesser, spør du meg. Eg fann dette norske mønsteret på nettet, og når namnet er 
"Liten fuggel" synest eg fargen dueblå som hovudfarge passa perfekt! 


Dessutan: eg vart så oppløfta av å kunne trylle fram fuglar av små masker, så eg fann meg raskt eit nytt "bevinga" mønster, denne gong til ein vaksen (... julegåve ...???) 
- frå ei heilt ny vottebok av to svenske bloggarar. Eg har lyst til å strikke omtrent alle mønstera dei har laga! Så snart eg er ferdig med dette første paret vil eg fortelje og vise meir!


oppskrift, dueblå vottar:
(lenke til mønster-butikken hennar)
garn: Nøstebarn silkeull (nettbutikk)
fargar: dueblå (nr 852) og natur (nr 810)
størrelse: ca 6 mnd? (original 1-2 år)
pinnar: 2,5 mm (betre med 2,0?)
mi endring: utan tommel (sjå fotoet under)
totalvekt: 14 gram
Takk for lånet av dei store og fine pappa-hendene! 

21. oktober 2013

VARM AV FROST - frosty sweater

Årets siste ute-ispinne? Den nystrikka genseren "Frost" held i alle fall på varmen!
Den skarpe haustlufta har lokka fram strikke-lysta mi igjen, etter ein lang og bloggefri sommar. Eg måtte starte enkelt, så eg snudde berre bunken med opp-skrifter, og landa på min tredje Mini Cobblestone! 

Det tynne alpakka-garnet eg brukte som "medløpar" (altså dobla med ull), er visst heilt nytt på marknaden, og bestilt frå dejlige Danmark: "Titicaca" frå Holst Garn. Finst det andre som har testa det? Eg diggar å blande alpakka med ull, då blir strikket litt mjukare, og gir også ein meir spenstig og melert effekt. 

Monstermønster har nettopp starta ein fin "Ull i bruk"-stafett, så inspirert av henne har eg fotografert "Frost"-genseren i lag med dei to Cobblestone-forgjengarane frå skapet. Begge er vélbrukte og temmeleg nuppete, ja! Spesielt den grøne som berre har mjuk Semilla fino-ull i seg. Men også den nye "Frost" skal få vere ein ekte kvardags-genser: Fritt fram for herjing i haustblad, sørpe og snø!

oppskrift, genseren "Frost":
etter original-oppskrifta Cobblestone av Jared Flood (Raverly) 
størrelse: ca 5-6 år
pinnar: 3,5 mm
garn: Holst Garn "Titicaca. 100 % pure thin alpaca"
... dobla med Isager Højlandsgarn eller
Geilsk tynd uld
totalvekt: 170 gram
fargar: 
og på fotoet under
garn-type sett ovanfrå og ned:
øvst: Titicaca thin alpaca, farge "Tiffany",
deretter Geilsk tynd uld, farge nr. 28
så Isager Højlandsgarn, farge "Topaz",
nedst Titicaca thin alpaca, farge "Jade"

2. juni 2013

STRIKKEPOSE-FEST! - knitting-bag party!

No har eg funne fram til vinnaren i strikkepose-trekningaDet var akkurat 30 fine svar til innlegget mitt, dermed leita eg fram Mummi-kalenderen min frå i fjor og klipte opp dei 30 dagane for juni. Og talet eg trekte ut vart 3! Så no veit de også at finsk og svensk namnedag for Orvokki og Viola er 3. juni. Men de vil kanskje heller ha namnet på vinnaren ...?

Vel, då seier eg gratulerer til Fuglemamma! Ein velfylt Raverly-pose kjem snart til deg i posten! Som de ser er garn-fargane inspirerte av dekoren på posen, og eg kan også røpe såpass at det finst både ull, alpakka, silke, bomull, kasjmir og til og med kamelhår i nokre av buntane. Ein aldri så liten fiber-fest med andre ord! 

Sist hinta eg også om at eg gir bort sjølve Raverly-posen  fordi eg no har byrja å sy mine eigne, super-enkle strikkeposar. Alt av gammalt stoff, altså redesign. På fotoet under ser de (frå venstre) det som ein gong var eit kjøkkenhandkle, eit buksebein, eit bukse-liv og ei barnepyjamas-bukse: 
Ideen til den kvite posen med hekla dekor på (nr 2 frå venstre, var ein gong beinet på sommarbuksa mi!) fekk eg frå den fine boka "Sikksakk. Sy barneklær av brukte voksenklær" av May B. Langhelle, og deretter spann eg vidare, og fann ut at eg kunne bruke øverste del av mi holete Noanoa-bukse til ein ny pose (i lys turkis, nr 3 frå venstre). Som de ser kunne eg dermed berre inkludere lommene som allereie var der. Og som snor valde eg eit gammalt måleband. Praktisk!

I går forsynte eg meg av pyjamas-buksa til yngstebarnet for å lage ein ny pose (den rosa til høgre), der dei umulege bananmos-flekkane forsvann bak ei grøn, applikert grein (... dvs eigentleg eit oppklipt kjøkkenforkle). Løpegangen i buksa gjorde eg ingenting med, den vart automatisk til opninga av posen!

Omtrent alt eg ser i klesskapet no får eg lyst til å sy pose av! Det er så moro! Med strikking startar du på null med berre éi maske, men når du syr ligg allereie stoffet der ferdig, alt du har å gjere er å sy nokre raske saumer - at dei blir litt skeive gjer ingenting, synest eg! Nøstebloggen har forresten også ei fin oppskrift på korleis du kan lage din eigen strikkepose. Men Langhelle sin "Dilldallpose" er pittelitt enklare. 

Neste gong har eg lyst å avansere litt, og prøve meg på ein strikkepose i "bøtte-form", altså ein som kan stå av seg sjølv, slik som f.eks. "Bucket tote" av ikatbag (gratis mønster), gjerne også med lommer både utanpå og inni. Eller kanskje har du eit betre tips? Kva brukar du som strikkepose, forresten? Fortel, fortel!

- Mamma! Kvar er yndlings-pyjamas-buksa mi? 
Du veit, den med dei rosa uglene på?
- Ehhh... Var ikkje den altfor liten til deg?
- Neeei! Og eg klarer ikkje å sovne utan den, veit du vel!

27. mai 2013

GÅVER TIL DEG, MEG OG MARIT - yarn swapping & give away

Delt glede er dobbel glede, ikkje sant? Etter at eg har prøvd garn-bytte (yarn swap) for første gong, gjennom Heidi og bloggen Wool rocks har eg lyst til å dele litt ekstra i etterkant: nemleg ei hemmeleg overrasking frå meg i ein Raverly-pose! Du som skriv ein kommentar under dette innlegget før laurdag 1. juni blir med på trekninga! Du treng ikkje skrive noko spesielt avansert (tilfeldig trekning), men gjerne dele med meg og andre kva du strikkar/heklar/syr/mekkar på akkurat no?

Heidis Springtime yarn swap er over, men eg håpar at ho - og/eller andre! - set i gang noko liknande seinare! Det var moro og spennande å vere med: Eg fekk Marit i Norge som byttevenn, og inspirert av tittelen sendte eg henne ein saftig og grøn mix! Håpar ho synest at grønt er skjønt ... Og sjølv fekk eg ein eksotisk pakke frå Edyta i Canada, med økologisk saueull frå Ontario og urtete for gode draumar!

Alt dette fekk meg altså i skikkeleg gåve-humør, og sidan eg har ein handarbeids-pose frå Raverly til overs, har eg fylt denne med noko snacksy for strikkarar, så no har du sjansen! Denne posen vann design-konkurransen som Raverly arrangerte for eitt år sidan, og då vart eg inspirert og bestilte to. No har eg forresten byrja å sy og "designe" mine eigne strikkeposar - meir om det seinare! 

Do you want to win a Raverly project bag, filled up by me with some surprises for knitters? Then you only have to write a comment here (with contact information) before the 1st of June. I am in a give away-mood, you see!

30. april 2013

BRUM-BRUM GENSER - a sweater for the little driver

Oppdatert 2. mai Ein mini-versjon av oppskrifta mi ligg no inne på Raverly!

Eg drøymer om å strikke eit blomster-teppe, eit lauv-mønstra sjal, ein florlett tunika ... Men når den store lidenskapen til 3-åringen er bilar, bilar, bilar - ja då er det berre å bøye seg i asfalt-støvet og lage ein "Brum-brum-genser". Og det vart ei artig oppgåve! Med garantert mjuke og miljøvennlege køyrety! 

Genseren er strikka på same måte som Sinnasau-genseren min til storebroren, i kroppsnær fasong, og i tynt ullgarn som skal passe bra no når den milde vårlufta er på veg. Maskene av den ubehandla saueulla strittar i alle retningar, men ein vask eller to skal vel gjere mønsteret jamnare. Genseren er strikka ovanfrå og ned (top-down), og ein uventa, fin effekt av aukinga på berestykket var at folkevogn-boblene strekte seg ut og forvandla seg til raske racer-bilar. I alle fall nesten ...


oppskrifta mi:
bil-mønsteret:
Skandi's Cars (Raverly) ... men altså med fleire masker inni bilane pga aukingane
størrelse: ca 3-4 år
garn: Isager Tvinni Tweed, farge: 21s (= mørkeraud/
rustraud)
Nøstebarn 2-tråds merinoull, farge: 806s/ny811 (= "naturbeige") og 808s/ny812 (= "naturbrun")
pinnar: 2,5 og 3 mm
totalvekt: ca 80 gram

Tut-tut! Strikke-arbeid pågår! 
Brum-brum genser (Raverly)

12. april 2013

MASKER TIL DEI MINSTE - knits for the newborn


Lenge sidan sist eg blogga. Livet, og til dels alvoret, kom imellom ...

Men no byrjar fuglane å kvitre igjen, og det gror i fleire mamma-magar rundt meg. Eg vil strikke velkomst-gåver! Men kva? 

I jakta på idear fann eg fram eit foto frå då min eigen nyfødde fekk på seg hentesettet, to dagar etter fødselen. Eg må flire nostalgisk: alt er litt for stort til ein så liten kropp. Men eg har i alle fall laga det sjølv! Og eg strikka mange gode tankar inn i maskene medan eg venta. Og plutseleg ein dag vart vesleprinsen stor, og plagga for små.


No klør eg altså i fingrane etter å strikke nyfødd-gåver til minst tre nære og kjære, som har termin framover mot sommaren. Har du gode idear og/eller ferdig baby-strikk å vise fram?

mitt eige, enkle hentesett:
hue:
"lettstrikka babyhue" frå Nøstebarn
jakke:
"rillestrikka omslagsjakke" frå Nøstebarn
sokkar:
"babysokker på to pinner" frå boka Myk start av May Bente Langhelle

... alt strikka i silkeull frå Nøstebarn, 
i fargane "natur" og "lys oliven"




1. januar 2013

VRIDDE NYTTÅRS-MASKER - New Year's knit with a twist

Eg tenner eit lys for det nyklekte året. Takk for det gamle! I dag festa eg også dei siste trådane på mine sjølvsnekra "Vridde vottar". 

Flette-feberen som kom på tampen av fjoråret følgjer meg nemleg enno, og no har eg også fått dilla på vridd rett! Vridde rettmasker kombinert med fletter lagar ein fin og tydeleg struktur - nesten som treskjæring, synest eg. 


Dette fiffige flette-mønsteret oppdaga eg først i gratis-oppskrifta "Liam's Loops Hat and Mittens", og laga ei raud julehue i alpakka til minstemann. Vottane som høyrde til settet var ikkje heilt etter min smak, difor laga eg min eigen vri, bokstaveleg talt - med dei fine "Staffvotter" av Mirrevirre som basis. 

I dag har eg skumma Raverly, og fann då fleire andre vottar som likna, men eg tek likevel "Vridde vottar" til hjartet som mine. Eg er allereie i gang med nye par, både for å prøve ut andre garntypar og for å forbetre detaljar, så kanskje kjem det ei ferdig oppskrift etter kvart ...

2012-nissen takkar for det gamle
- med nystrikka "Liam's Loops"-hue!


strikke-fakta:

"Vridde vottar" © 
av Frida/Silkesauen (Copyright)
garn: Artesano Aran,
(50 % alpakka, 50 % ull)
farge: Maple (naturleg farge)
pinnar: 4,5 mm
størrelse: dame
forbruk: 93 gram
garn: Pickles Pure Thin Alpaca,
dobla
farge: Tulipan
pinnar: 3,5 mm
størrelse: Small 
(passar til 3-åring pga tynnare garn)
forbruk: 53 gram








Related Posts Plugin for WordPress, Blogger...