26. desember 2012

EI GOD JUL - a warm and merry Christmas

... ynskjer eg alle strikke-venner og herlege bloggarar
med hjelp av ein bunt "Debbie Bliss Andes" i fargen Ruby.
Foto av mine ferdige jule- og nyttårsmasker kjem litt seinare :-)

1. desember 2012

Å PYNTE TIL ADVENT - the colors of Advent


Allereie advents-helg! Men kvar vart pynten min frå i fjor av? Og kva er eigentleg den "rette" advents-fargen ...? Blålilla eller raudlilla? Og er det ein faktisk skilnad på lilla og fiolett??? Då eg googla desse orda i dag tidleg kom eit ras av motstridande meiningar - blanda med vitskapleg fargelære, og eg var for trøytt til å bli så mykje klokare.

Og kanskje er lilla/fiolett uansett litt "ut" som pynte-farge i heimen? Han er i alle fall ein særing som ikkje er så lett å kombinere med andre fargar enn kvitt og grått, eller kva seier du?  

Mi nedteljing til advent var i alle fall å strikke denne lilla vesten

Utgangspunktet var ein svært enkel, rillestrikka baby-vest som eg forma litt om, pluss at eg igjen henta fram ideen med ugle-striper frå vesten  "Små grå" (Owlets and moles)

Men akk, alle dei skinande perle-augene som eg hadde tenkt å sy på ... Tolmodet tok slutt allereie etter to par, men å ha noko til gode er alltid godt, ikkje sant?  




oppskrift, advents-vest:
av Susie Haumann, frå heftet "All you knit is love"
... med mine endringar (ugle-mønster og innsvinga erme-kantar)
garn: 
Nøstebarn silkeull, farge: lilla 
- dobla med Isager Alpaca 1, farge: nr. 013
total-vekt: 89 gram
pinnar: 3,5 mm
størrelse: ca 4 år 
(la opp 110 m, dvs størrelse 12-18 mnd 
i original-oppskrifta, som er med tynnare garn)
PS: Denne Arne&Carlos-inspirerte kula laga eg i fjor,
og døypte han "Snøkatt i adventsnatt"




24. november 2012

HUE, LUE, MÖSSA - three hats

Små hovud treng vern mot Kong Vinter. Men kvar vart huene frå i fjor av ...? Dei er visst alle for små! Dermed fekk eg ein grunn til å teste nye hue-oppskrifter. Her er resultatet!

Den blå hua med grøn bølgje-kant er "Små vågor", som eg oppdaga på den inspirerande bloggen til Maria Carlander. Enkel, men likevel så fin! Og mixen av to fargar gjer den glimrande til å få brukt opp restegarn.

Dei to andre huene, altså dei med flettekant, er "Lue med øreklaffer" av Marte Helgetun. På den brune i rein alpakka følgde eg oppskrifta nesten frå A til Å (bortsett frå at eg m.a. droppa snorer til øyreklaffane), men på den raude brukte eg forkorta rader (short rows), istadenfor å lukke toppen med holrad og snor. Desse to skal nok halde både vind og snø borte frå små, sarte øyrer!

I dag sjekka eg også ordboka, og lærte at "lue" kjem frå norrønt lúva, som betyr "tjukt og tett hår". Dermed passar det bra at alle dei tre nye huene eg har strikka inneheld alpakka:  Som nettopp er hår, og ikkje ull! 

Dagens tips (men ikkje sponsa): Hos Marte Helgetun kan du vinne strikkepinnar i tre for ein tusenlapp om du sender inn foto av noko du har strikka av hennar design før 30.november.


oppskrifter:
garn: "Road to China Light"
(babyalpakka, kasjmir, kamel og silke!)
i fargane Blue Tourmaline (blå/turkis) og Malachite (grøn)
total-vekt: 27 gram
størrelse: ca 3 år (eg la opp 81 m)
pinnar: 3 mm

frå boka "I all enkelhet"
garn, brun hue:
"Drops Alpaca", dobla i fargen 0607m (pluss ein rest 0168 til snora)
total-vekt: 49 gram
størrelse: 4 år (vart stor, passar også meg!)
pinnar: 4,5 mm
garn, raud hue:
"Semilla fino" i fargen 116 dobla med "Isager Alpaca 1") i fargen 21/25
total-vekt: 34 gram
størrelse: 4 år
pinnar: 3,5 mm 

22. november 2012

RETT I FLETTA - cable knit crush

Eg har tørka støv av flettepinnen min! Kvifor let eg han liggje så lenge ...? Flettestrikk er då kjempemoro! Og slett ikkje så innvikla som ein kanskje skulle tru.

Den rustraude, vesle saka her på fotoet er straks ferdig - og då kan eg avsløre kva det er. Men i bakgrunnen ser du fronten på ein genser eg strikka til meg sjølv for mange år sidan.

No i flette-feberen har eg rota i gamle papir, og faktisk funne fram til oppskrifta eg brukte (nede til venstre), kalla "Genser med Aran-mønster", i eit KK anno 1990. Der fann eg også ei stilig vinter-jakke/kåpe (nede til høgre), men sjølvsagt manglar siste del av oppskrifta. Typisk. Kanskje eg får kontakte KK direkte, eller kanskje kan du hjelpe meg vidare...? Men den stakkars reven rundt halsen seier eg nei takk til, altså! 

OPPDATERING: Ja! Systro med bloggen Systerstrikk melder at ho faktisk har denne oppskrifta, og vil gi meg ein kopi! Heldige meg!

18. november 2012

BITTELITA STJERNE - a tiny star





 As your bright and tiny spark,
Lights the traveller in the dark.
Though I know not what you are,
Twinkle, twinkle, little star.

        (voggesong av Jane Taylor, 1806)

No har eg mi eiga, vesle stjerne her på bordet. Og sanneleg, eg veit ikkje heilt kva ho er:

For denne hua vart så bittelita at ho nok passar betre til ei dokke enn til ein nyfødd. Eller kanskje eg heller skal bruke ho som nålepute på knappe-glaset mitt ...? 

Uansett blir eg mjuk i hjartet av dette fine stjerne-mønsteret, så eg skal nok gjere fleire forsøk for å finne den rette babyhue-størrelsen. I ein varm raudfarge kan dette bli ei herleg julestjerne-hue, ikkje sant?

oppskrift:
(... og dén hua vart for stor!)
garn:
silkeull frå Nøstebarn i fargen "lyng" (forbruk: berre 10 gram)
pinnar: 2,5 mm

11. november 2012

ULNE UGLER - Ocean Owlets



Ugler flagrar rundt i hovudet mitt for tida! 

Og lyden av deira mystiske "uuuhuuu" er blanda med små bølgje-skvulp: Fargane akvamarin (frå Nøstebarn) og sjøskum (frå Pickles) låg nemleg i garnkorga mi og trygla om å bli blanda med kvarandre! Resultatet vart ein mild, grønblå melert genser - i yndlings-mixen min for tida: ull + alpakka.    

Det fine uglemønsteret til Katie Davies prøvde eg først ut i ein vertikal versjon på vesten "Små grå", men her er altså original-genseren til Davies (... med nokre små endringar av meg, sjå Raverly), omkransa av ugler rundt halsen. Min trufaste maske-markør passa som de ser perfekt til akkurat dette prosjektet!

Som vanleg tenderte eg mot minimalisme, og sydde berre på eitt par ugle-auge på genseren, istadenfor å måtte tømme heile knappe-lageret: 19 ugler med 2 auger kvar ville nemleg bety 38 knappar!

Nye ugler er allereie på pinnane må eg innrømme, så det er berre å følgje med! Har du ein dyrisk strikke-favoritt?


oppskrift:
...men med tynnare garn enn Davies foreslår,
eg brukte difor masketalet frå:
garn: 
Nøstebarn 2-tråds merinoull i fargen "akvamarin"
dobla med Pickles Pure Thin Alpaca i fargen "sjøskum"
pinnar: 3,5 og 4 mm
størrelse: ca 4-5 år
totalt forbruk: 193 gram



3. november 2012

FINE RUSK - small heartwarmers



Den poetiske strikkebloggen Rare rusk er ein av "påfylls-stasjonane" mine på nettet  - det er alltid ei sann glede å dvele der ei stund! 

Ho som står bak bloggen, Line, er også komen eit godt stykke vidare enn meg, ho publiserer nemleg eigne mønster! Og no har eg prøvd meg på to av vestane hennar, som har vårlege namn som "Spire" (til venstre) og "Lille gåsunge" (til høgre.) 

Eg starta på begge i god tid før sommarferien - altså før eg gjekk inn i den lange strikke-dvalen ... Men no har eg endeleg funne knappar, hekla kantar og festa trådar. Ferdig!

Oppskrifta "Lille gåsunge" (til høgre) følgde eg omtrent frå A til Å, i herleg og luftig alpakka-garn frå Pickles. 

"Spire" derimot flaug sin eigen, fantasifulle veg - og fekk ei totem-stripe med små ugler nedover brystet. Eg valde dessutan å berre bruke éin farge istadenfor tre, nemleg den spesielle moldvarp-fargen (vanskeleg å fange korrekt på foto!) i silkeull frå Nøstebarn.

Alle desse endringane gjorde at eg rota meg bort i skogen fleire gonger, og den som ser nøye etter vil nok oppdaga nokre (små) feilskjær og skjønnheitsfeil. Men vi får kalle det personleg preg...

Noko heilt anna som irriterer meg mykje meir er at eg ikkje har noko enkelt og godt fotobehandlings-program etter at picnik.com la ned før sommaren. 

Kva brukar de andre i bloggverda for å lage fine foto-montasjar, farge-korrigere og slikt? Eg blir glad for gode tips! Gjerne "rett frå nett". Eller så får eg vurdere å installere eit program. (PS: Eg brukar Mac.)



Vesten "Små grå" (Owlets and moles):
oppskrift:
ugle-mønsteret:
frå genseren "Owls" av Katie Davies
(...som eg laga i ein vertikal versjon)
garn: Nøstebarn silkeull
farge: "muldvarp" (mole)
(... og "lyng" og "lilla" til broderte ugle-auge)
forbruk: 59 gram (størrelse ca 3 år)
pinnar: 3 mm
knappar: perlemor frå lageret


Vesten "Vesle bølgje" (Waves and willows):

garn: Pickles Pure Thin Alpaca
farge: "sjøskum" (no utgått?)
forbruk: 68 gram (størrelse 3-4 år)
pinnar: 3,5 mm
knappar: kokos med farga glasur
No er det nok posering for i dag!

21. oktober 2012

SAUESANKING - rounding up the sheep

Etter ein lang og strikkefri sommar vakna eg endeleg opp av dvalen.

Dei kjølege morgonane og dei mørke ettermiddagane kalla nemleg fram gamle minner: Noko om den gode lukta av feit, våt ull, om den fine klangen av metallpinnar som klirrar...

Så! Sauene som stirra bedande på meg, frå blogg etter blogg! 

Heilt frå Shetland kom dei, med Kate Davies som hyrde, spreidde seg som fargesprakande Saue-huer hos Torirot, som Sinnasau-jakka til Pinneguri, som Vibekes Ville sauer ...

Og når eg så oppdaga den fine og lett-strikka barnegenser-versjonen hos GryHege var det ingen veg tilbake. Eg ville også vere med på sauesanking!

Nøsta trilla villig ut av dei støvete skapa mine, og av fire ulike fargar med restegarn fekk 5-åringen seg ny og florlett genser. Som de ser
er også Silkesauen fornøgd med selskapet.


Dermed ei varm takk til alle nettvenner som fekk meg tilbake til blogginga og strikkinga. Den lange pausen har ikkje hatt alvorlege årsaker - det var berre sjølve livet som kom imellom!


oppskrift:
Sinnasau-barnegenser av GryHege (Raverly)
(blir strikka frå halsen og ned, also top-down)
... med utgangspunkt i:
... og inspirert av fargane i
Vibekes "Ville sauer"-jakke
garn:
Isager Højlandsgarn i fargane topaz (lys blå), robins egg (turkis) & truffle (brun)
Isager Tvinni Tweed i fargen 6s (natur)
pinnar: 2,5 og 3 mm
total-forbruk: 90 gram (størrelse ca 4-5 år)





13. juni 2012

DOBBEL COBBLE - another Cobblestone


Frå grønt til raudt! Når eg først var i farta med den lett-strikka Cobblestone-genseren var det vanskeleg å stoppe: Dermed ser dei to smågutane ut som eit levande trafikklys for tida:-)

Genseren er så enkel å sjå til at eg spør meg sjølv om dette kan kallast noko så avansert som design? Men thanks a lot anyway, Jared Flood!  

For å få den raude genseren litt større enn den grøne - utan å involvere innvikla matematikk - brukte eg akkurat same maske-tal, men let ein tynn alpakka-tråd følgje med ullgarnet, og la elles til nokre centimeter på lengda. Dette funka fint.

Neste gong får eg vel strikke éin til Onkel Blå, såleis blir primær-fargepaletten komplett! 

oppskrift, raud genser:
etter original-oppskrifta Cobblestone av Jared Flood (Raverly) 
størrelse: ca 4-5 år
pinnar: 3,5 mm
garn: Semilla fino (frå BC Garn) - dobla med Isager Alpaca 1 
fargar: 
Semilla fino: farge nr 116 (= raud, brukt 127 gram)
Isager Alpaca 1: farge nr 25/21 (= raud, brukt 56 gram) 
... og på bryststykket: farge nr 59 (= gul, brukt 13 gram)
totalvekt: 183 gram

PS: Er det nokon som har lyst på ein liten kopp grøne nuppar...? Dette er dagens fangst frå den grøne (og velbrukte) Cobblestone-genseren. Semilla fino-garnet er mjukt og godt, ja, men altså ikkje nuppe-fritt. Eg er spent på om den nye, raude versjonen oppfører seg annleis, med den tynne alpakka-tråden strikka inn.  


12. mai 2012

MANNFOLK-ARBEID - man made


Kor ofte står ein mann bak strikke-oppskrifta du brukar? Bortsett frå julekulene til Arne & Carlos trur eg sanneleg det finst fint lite av maskuline signaturar i mine eigne mapper. Farge-fantasten Kaffe Fassett har eg sjølvsagt lagt merke til, men til no berre beundra på avstand... 


Det vart ein amerikanar i New York som fekk meg våryr nok til å gi meg i kast med denne genseren: "Cobblestone" av Jared Flood (portrett-intervju). Namnet Cobblestone er visst inspirert av det rustikke gatemiljøet i Dublin (norsk: brustein), men med den saftige fargen eg valde, trur eg min versjon må døypast om til Mister Greengrass. 


Nokon synest kanskje at eg har "øydelagt" dei fine sirklane i bryststykket (the yoke) ved å velje raglan-felling, men eg synest faktisk dette gir eit finare snitt, i alle fall til den som enno ikkje har opparbeidd seg breie skuldrar. 
Til min vesle mann på snart tre somrar følgde eg tipsa til bloggen Månestråle for å lage ein barneversjon. Tusen takk, Månestråle!


Det økologiske garnet Semilla fino har eg her prøvd for første gong. Herleg mjukt og lett - og med eit fint, svakt melert skín. Men kvifor er dette så mykje mjukare enn merinoulla til f eks Nøstebarn lurer eg på...? Kanskje er ikkje garnet så robust i bruk då? 
Vel, kvalitets-testinga er i full gang: Med ploppestein-kasting, blomster-plukking, mamma-kosing og anna ekte mannfolk-arbeid.




oppskrift:
etter original-oppskrifta Cobblestone av Jared Flood (Raverly) 
størrelse: ca 3 år (pga tynnare garn enn Månestråle)
pinnar: 3 mm
garn: Semilla fino (frå BC Garn), 50 gram = 240 meter
farge: grøn nr 133
forbruk: ca 115 gram


8. april 2012

OPERASJON LAUVSPRETT - longing for leaves


Når kulden nektar å la knoppane breste, sjølv om kalenderen viser april, er det ikkje noko anna å gjere enn å lokke fram våren ved hjelp av strikkepinnar og godt garn. 


Eg starta min Operasjon Lauvsprett med å prøve ut "Just a Leaf"-snorene til Hinke i grønt (... kan vere fine å lage gåveband av?), og deretter friska eg opp den enkle jakke-oppskrifta "Stumpen" til Bente Geil ved å tilføye to gylne lauv nede på jakkeslaga.


Javisst, no kan våren kome!
oppskrift, jakke:
med lauv-ornamentet frå "Greenfield cardigan" av Melissa LaBarre 
(innlogging Raverly)
garn: Isager Højlandsgarn (brukt ca 90 gram)
farge: "maize" (altså mais)
størrelse: 2 år
pinnar: 3 mm (vurderer 2,5 neste gong)
knappar: perlemor med grøn-skjær

oppskrift, grøne lauv-snorer (gratis):
"Just a leaf" av Hinke (innlogging Raverly)
garn: restegarn
pinnar: 3 mm
Naturfoto av lauv øvst i innlegget: Jon Sullivan, pdphoto.org

11. mars 2012

SMÅTT OG GODT FRÅ DANMARK - danish delights

Ja, no har eg sanneleg strikka to vestar til ... Denne gongen dejligt, dansk design signert to ulike medlemmer av Isager-familien: Klassikaren Lille livstykke av mor Marianne Isager (oppe til høgre), og den ferske Lark av dotter Helga Isager (oppe til venstre og nedanfor). 


Etter å ha kaldsveitta meg gjennom alle dei ti episodane av krimserien Broen på NRK må eg seie at det har vore velsigna godt å finne ei fredeleg hamn igjen med mjukt garn og trygge, danske beskjedar som: "slå op på en lille rundpind", "strik den anden skulder magen til" og "luk nu jævnt av".
Helga Isager sjarmerte meg med den poetiske tittelen The Bird Collection, 
som er namnet på det nyaste heftet i strikke-serien hennar, Amimono. Alle plagga har også fått namn etter kvar sin fugl, og vesten Lark (lerke) er igrunnen ein moderne vri på mor Mariannes Lille livstykke: 

Begge har perlestrikk på berestykket framme, men Lark har freidig forskyvd knappe-stolpen til eine sida. Lille livstykke har tradisjonell og god ribb rundt livet, medan Lark krev meir tolmod og tid hos strikkaren ved å be om *tre vrange og ein vridd rett*. Kven likar du best, mora eller dottera...?

oppskrifter:
(gratisoppskrift frå shop.isagerstrik.dk)
garn: Drops Alpaca (50 gr - 167 m)
farge: nr 0618 "lys beige eco"(= naturleg, ufarga)
storleik: la opp 164 masker = ca 3 år
endring: strikka rundt istadenfor fram-og-tilbake
forbruk: 80 gram
pinnar: 3 mm
knapp: perlemor

"Lark" av Helga Isager (shop.amimono.dk)
frå heftet Amimono. The Bird Collection.
Kan visst også kjøpast som enkeltmønster i kit
garn: Isager Alpaca 2 (50% alpakka, 50% ull)
(originaloppskrifta derimot foreslår 
Isager Highland Wool dobla med Isager Alpaca 1)
farge: nr 19 (livet) og nr 24 (berestykket)
storleik: 3 år (vart litt liten til 2-åring)
forbruk: totalt 51 gram (32 gr av nr 19, 19 gr av nr 24)
pinnar: 3 mm
knappar: perlemor (... litt for store?)

14. februar 2012

VARME BØLGJER - warm waves

Etter at "Mor Signes babyteppe" hamna i 60 grader-vasken (med vilje...) og kom ut igjen i dokke-versjon, har vi ikkje hatt noko heimelaga teppe her i huset. Men framskunda av sprengkulda - og ikkje minst inspirert av det imponerande koseteppet på bloggen til Sommerfuglen, har eg no endeleg festa dei siste trådane på teppet til minstemann: Dermed vart det dagens Valentin-gåve. 



Planen med teppet er 
å bruke det i barnevogna når toåringen blir trøytt og kald, og fargane er valde ut for å også passe til litt skit og sølevatn, som gjerne følgjer med på ferda. 

Orginaloppskrifta kjem frå DROPS Design, men eg forenkla ved å bruke færre fargar, og å bryte opp bølgjemønsteret med lengre "kvileskjær" av einsfarga rillestrikk. Godt for strikkaren, og også godt for auget med slike rolege felt, synest eg. 
God og hjartevarm Valentin ynskjer eg alle!

oppskrift:
DROPS teppe med bølgemønster (gratis frå garnstudio.com)
men med færre fargar, og område med berre rillestrikk mellom bølgjene
garn (= ull dobla med alpakka):
mørkebrunt: Isager Højlandsgarn farge "truffle" dobla med Drops Alpaca eco nr 0607m
lyseblått: Isager Højlandsgarn farge "topaz" dobla med Isager Alpaca 2 farge nr 019
natur: Nøstebarn 2-tråds naturbrun dobla med Drops Alpaca eco nr 2020m
pinnar: 3,5 mm (4 mm eller meir hadde vore kjappare...)
totalvekt: 515 gram
storleik: ca 90 X 105 cm

8. februar 2012

VILL ETTER VEST - Wild about vests

Eg blir visst aldri lei av å lage vestar! Eg trur eg snart må innrømme at dette er i ferd med å bli ein aldri så liten lidenskap... Men tenk om alt hadde vore så enkelt og sjelevarmande som ein barnevest kan vere det ein frosen vinterdag. 


No har eg prøvd meg på to nye -  og dejlig danske - oppskrifter, begge henta gratis frå nettet.  Og kanskje det aller beste: begge er strikka på rund-pinne! Garnet har lege og modna sidan i haust, då eg sporenstreks skaffa meg to av dei nye fargene til Nøstebarn, nemleg moldvarp og akvamarin. Spesielt moldvarp-fargen er fascinerande: Er han grå? Er han beige? Eller har han eit skjær av rosa-lilla-raudt? Hm, eg trur litt av alt - rett og slett som ein moldvarp! 

Oppskrifta på den akvamarin-farga-vesten heiter Babys uldne undertrøye, og originalen foreslår fram og tilbake-strikk, men her rista eg laust og følgde rådet frå Monstermønster, og strikka rundt, og i tillegg laga eg knappestolpe slik som Synnøve i bloggen - with 100% love - . Hjarteleg takk til begge! Eg elskar å fyke rundt på strikkebloggar for å fylle inspirasjons-tanken min!  


Eg lurer forresten på om Ein gul knapp no strikkar babyteppe av akkurat den same akvamarin-fargen? Det er ikkje så lett å få fram korrekt nyanse på fotoa her, men det eg diggar med denne fargen er at han er så lite sukkersøt, altså langt frå klassisk babyblå. Kanskje meir i retning brevatn...? 



For temmeleg nøyaktig eitt år tilbake laga eg Ein liten vest-kavalkade  (januar 2011), og no kan eg altså føye to nye mønster til favoritt-lista mi. Kven blir den neste vesten? Kanskje du har eit drivande godt tips ..??? 

oppskrift, akvamarin-farga vest:
Babys uldne undertrøye (gratis frå familiejournal.dk)
garn: merinoull 2-tråds frå Nøstebarn
farge: "akvamarin" (= nr 61) 
storleik: 1 år (= passa til min to-åring)
forbruk: 41 gram
pinnar: 3 mm (2,5 mm truleg betre)
knappar: treknappar med bork


oppskrift, moldvarp-farga vest: 
Babyslipover (gratis frå femina.dk)
storleik: 0-1/4 år i masker, 2 år (pluss litt til) i cm
for å passe til 2-åring. Vart meir enn stor nok
garn:
silkeull frå Nøstebarn (merk: eg dobla garnet)
farge: "muldvarp" (= nr 15)
forbruk: 93 gram (altså med dobla garn)
pinnar: nr 3 og 3,5 mm
knappar: trekanta perlemorknappar
Related Posts Plugin for WordPress, Blogger...