23. november 2010

KEISARENS NYE GARN...? - A fairytale fiber?



Då eg opna den fine babystrikk-boka Myk start av May B. Langhelle for første gong og las om "Mykeste myke jakke" byrja ordet kasjmir (cashmere) å sveve rundt som ei lysande, lita stjerne i bakhovudet mitt. Men eg gjorde ingenting med denne draumen, det var for abstrakt, og for dyrt. 


Ei god stund seinare var eg på reise, og oppdaga verdas koselegaste garn-butikk, med verdas nydelegaste eldre dame bak disken. Ho ville gjerne vise meg sin nyaste skatt: Små buntar med handfarga, tynt kasjmir-garn frå geiter i Indre Mongolia. Ja, kva anna kunne eg gjere då enn å vandre ut igjen, med 55 fjørlette gram i fargen "Blueberries & Plums", til den nette sum av 35 Euro...


Fargen er heilt etter min smak: djupt blåbær-blå med nokre fine skjær av plommeskal-lilla som dukkar opp av og til (kjem ikkje så godt fram på fotoet). Og garnet er mjukt, ja, uendeleg mjukt ... nesten litt ... slapt... Og tråden slitnar skremande lett - men heldigvis ikkje medan eg strikka. Eg er rett og slett temmeleg skuffa over kvaliteten, og spør meg sjølv om eg har hamna i den same fella som keisaren i eventyret? Eller kanskje var det forventningane mine som var for høge? Og pengepungen som vart så sørgeleg tom?


Men pulsvarmarane ser i alle fall bra ut, takka vere den fine oppskrifta  Blonde av Pinneguri på bloggen hennar Med pinner. Eg har berre endra bittelitt på "stripa" før mønsteret. Då eg la pulsvarmarane på kjøkkenvekta viste ho 14 gram! Det betyr om eg gir kasjmir-nøstet mitt ein sjanse til, og også strikkar litt kortare mansjett, kan eg klare å lage totalt 4 par pulsvarmarar! Då blir dette kanskje eit eventyr som endar godt likevel. 


For the first time I have knitted something in cashmere. But I must say I am quite disappointed about the quality. Soft, oh yes, but I find this yarn too unelastic and too breakable. But nevertheless I think I will give it another try later, maybe from another brand. 




oppskrift: Blonde av Pinneguri 
garn: Mongolian Cashmere 2-ply, 55 gr - 366 m (brukte 14 gr)
farge: Blueberries & Plums (nr 36)
garn-firma: Jade Sapphire Exotic Fibres
pinnar: to strømpepinnar 2,5 mm (hadde vore betre med 2,0 mm?)

2 kommentarer:

  1. Ebay er tingen om man er på jakt etter kasjmir i en pris som fungerer for oss vanlige dødelige. Et tips er å sjekke inneholdet i nøstet, mye som er merket kasjmir er 5% ren vare og resten ull eller akryl. Sånn innmari holdbart er det ikke, og ikke så elastsik som ull, men det har ikke forhindret meg i å strikke en jakke til babyen i det. når ellers er man liten nok til at et nøste holder til en jakke? :)

    Du etterlyste tips til sammensying, jeg har ikke gode nettressurser på akkurat den typen du etterlyser, men om du spanderer en hundrelapp på Interweave knits, vårnummeret fra 2010, så er det en storartet artikkel med gode illustrasjoner fra Techknitter (en av mine store teknikkfavoritter, google techknitting for en fabelaktig teknikkblogg).

    SvarSlett
  2. Takk for tips, Monstermønster! Interessant det du skriv om kasjmir, på "magebandet" står 100 % cashmere, om det då er til å stole på. Kanskje har foredlinga ikkje vore så bra/for røff? Eg veit for lite om slikt, er på tryggare grunn med saueull :-)

    Og vårnr til Interweave Knits står no på handelista mi!

    SvarSlett

Related Posts Plugin for WordPress, Blogger...