Å strikke bærspannet fullt

Når ein bur midt i byen og lengtar etter moltemyrer og fjelluft, er det ikkje anna å gjere enn å strikke seg ein haug med herlege bær sjølv.

No har eg laga eit par moltevottar, der bæra modnar etter kvart som dei nærmar seg toppen. Dei fine, raud-oransje nyansane kan eg takke "Sauen på haugen" for, altså plantefarga garn frå kollega Anne i Vottelauget.

Utgangspunktet er den stilige oppskrifta "Blåbærskogen" av Wenche Roald, men for første gong har eg testa ein tommelvariant som m.a. blir kalla "fried chicken" eller "livslinje-tommel". Fungerte veldig fint! 

No har eg sanneleg allereie gitt bort desse moltevottane i bursdagsgåve, så eg må nok strikke eit nytt livslinje-par, for å få prøvd ut tommelgrepet i praksis. Eg er altså klar for ein ny bærtur! Blir du med?

Nostalgi: Moltefangsten frå i forfjor ...

Fuglehjarte - ei barnehue

På denne hua står fuglar og hjarte tett i tett, og kan varme små hovud i vinter. Kanskje ein julegåve-idé til nokon du kjenner? 

Oppskrifta vakna til liv då eg sat ved PCen og leika meg med diagrammet på vottemønsteret Eventyrlauv frå boka vår Eventyrvotter. Plutseleg forma hjarta seg om til fuglar, vottane vart til ei hue - og i toppen dukka ei optimistisk stjerne opp. 

Eg har bestemt meg for at alt sal av denne oppskrifta skal gå til Dråpen i havet (heimeside) i heile desember. Dråpen i havet er ein humanitær bistandsorganisasjon som arbeider for å hjelpe menneske på flukt, og dette blir mitt vesle bidrag i vinterkulden. 

Fuglehjarte blir publisert i dag (7. desember) og er til sals via Raverly. Oppskrifta er fleksibel både i størrelse og fargebruk. Du kan f. eks. velje om hua skal ha to eller tre fargar. Frå 1. januar 2017 blir Fuglehjarte ei vanleg kjøpe-oppskrift.

PS: Du treng ikkje vere medlem av Raverly for å handle der, 
og du treng heller ikkje ha ein PayPal-konto. 

Å STRIKKE EIT EVENTYREGG

"Det har jag aldrig provat förut, så det klarar jag säkert!" sa Pippi. 

Vel, eg hadde aldri strikka ein eggevarmar før, så då eg foreslo for dei andre i Vottelauget at vi kunne ha noko slikt som tema for mars, måtte eg sjølvsagt prøve ut om dette var liv laga. Her er resultatet!

Og det viser seg: Kan du strikke vottar, kan du også strikke eggevarmarar. Eller #eventyregg, som vi har døypt aksjonen vår. Og har du ikkje strikka vottar enno, kan eit eventyregg vere ein fin og lett inngang. Her treng du verken å streve med ein brysam tommel, eller bekymre deg for at lange trådsprang på innsida fører til at fingrar hektar seg fast. 

Mansjetten kan du også droppe. Eller kanskje kan nettopp mansjett-mønsteret bli til eit stilig eggevarmar?

På bloggen til Vottelauget kan du lese meir om aksjonen #eventyregg - og om reglane som gjeld om du vil delta i konkurransen med frist 31. mars. 

Slik strikka eg mine eventyregg:
Mine notatar er slett ingen fasit, men kan vonlegvis gi inspirasjon og praktiske tips - og kanskje har du endå lurare løysingar som du kan dele med oss?

Eg tok utgangspunkt i eit vanleg norsk hønseegg, men har du vaktlar eller ein struts i hagen må du sjølvsagt tilpasse størrelsen deretter ... 

:: Tommelise :: 
Det lettaste for meg var å starte med mitt eige design, nemleg babyvottane Tommelise. Det ferdige paret (blå) som er str. 3-6 mnd. viste seg å vere litt for smale til frukostegget mitt. 
Dermed la eg opp 2 ekstra kantmasker i gult på kvar side, for å få "eggevotten" litt breiare. Altså 40 m (istadenfor 36 m).

Bølgjemansjetten i starten droppa eg. Eg strikka istaden 3 riller i grønt (*1 omg vrangt, 1 omg rett* x 3) før eg starta på diagrammet. Eg følgde same felling som i oppskrifta, altså spiss felling a la Selbu. Til slutt pynta eg litt ekstra ved å brodere maskesting i rosa og grønt.

Garn: Rauma Finull
Pinnar: 3 mm
Strikkefastheit: 26 m/10 cm
Størrelse: breidde ca 7,5 cm (omkrets 15 cm) og høgde 10 cm

:: Reveenka/Harehopp ::
No visste eg at 40 m passa fint med mi strikkefastheit i Finull.
Eg fann fram diagrammet til Reveenka, og merka av hare-motivet, som går over 8 masker. 8 x 5 = 40 m. Først laga eg ein kort vrangbord over 5 omg, med *2 rette, 2 vrange".  Så var det harane sin tur. Desse har eg også prøvd ut på barnevottane "Harehopp". På eventyregget tok eg rundfelling, altså 1. omg. *3 m rett, 2 sm*. 2. omg: rett. 3. omg. *2 m rett, 2 sm" osv ... til eg hadde 8 m igjen.

Garn: Rauma Finull 
Pinnar: 2,5 mm (altså litt tynnare enn på Tommelise)
Strikkefastheit: 28 m/10 cm 
Størrelse: breidde ca 7 cm (omkrets 14,5 cm) og høgde 9 cm

:: Nordstjerna ::

No fekk eg lyst til å prøve ut mykje tjukkare garn, og fann fram to nøste med restegarn i Peer Gynt. Dette viste seg å passe perfekt til tommel-diagrammet på den vakre Nordstjerna av Wenche Roald. 

Tommel-diagrammet på 28 m + 1 ekstra kantmaske i kvar side = 30 m. 

Eg starta med ein kort mansjett, *1 rett, 1 vrang" over 3 omg. Deretter følgde eg diagrammet for tommel, og felte også på same måte som i oppskrifta. 

Garn: Peer Gynt frå Sandnes

Pinnar: 4 mm

Strikkefastheit: 22 cm/10 cm

Størrelse: breidde 7 cm (14 cm omkrets) og høgde 12 cm, altså temmeleg lang)

Neste gong vil eg nok ta to fargar med meir kontrast, slik at mønsteret kjem tydelegare fram. Og truleg ta 32 m (istadenfor 30 m).

:: Nøkken ::
Dei raude Nøkken-vottane har vore den store favoritten til 8-åringen min i vinter, og dei stirande augene måtte også få plass på eit eventyregg. Originaloppskrifta til Nøkken er Merete Jansvik Toft meister for. 

Eg la opp 40 m. Nøkken fekk påskegule tenner og grønskete skinn ved hjelp av fleirfarga vrangbord (som i oppskrifta på Grantreet), dvs *2 rette i gult, 2 vrange i grønt*. Auge-diagrammet plasserte eg med 3 masker avstand. Rundfelling som hos Judiths eggeluer. Og hårtustane drog eg gjennom ved hjelp av ei heklekrok.   

Garn: Cheeky Merino Joy frå Rosy Green Wool (her handfarga av Ninapetrina og Dandelion Yarns). 
Pinnar: 2,5 mm
Strikkefastheit: 30 m/10 cm
Størrelse: breidde 6,5 cm (omkrets 13 cm) og høgde 9 cm. 

Desse heimestrikka eventyregga veg mellom 6-11 gram, altså perfekte prosjekt for restegarn. No er eg spent på å sjå kva for eventyregg andre klekkjer ut i vekene framover! Lukke til!

GYLLEN FLYGETUR - frå bygda til catwalken

Foto: Anne Sofie Fodstad (copyright)

Tenk at ulltrådar kan få venger - og flyge både i tid og rom!

Gullfuglen-vottane mine kom ut av "egget" på eit excel-skjema i fjor vinter, og etter mykje finpussing og teststrikking landa oppskrifta hos Aschehoug Forlag. 

Eit eksemplar av boka vår Eventyrvotter fann også vegen til ei makelaus kvinne eg ikkje hadde møtt før, nemleg Kristin Elise Halkjelsvik i Fredrikstad.

Ho ville gjerne gjere Gullfuglen flygedyktig for catwalken, og utstyrte vottane med herlege paljettar og brusande fjør. Dette vart opningsantrekket under visninga hennar i Oslo 31. oktober.

Foto: Anne Mari Akslen i sjølvstrikka genser (copyright)

Og overdelen vart ein eventyrleg match: Ein genser frå 50-talet, som Kristin Elise hadde oppdaga hengande på ein knagg i eit gammalt hus i Ørsta. Det er heimbygda mi, det! 

Det viser seg at denne genseren vart strikka av den unge kvinna Anne Mari (f. 1941), medan ho gjette sauer under bratte, sunnmørske fjell. Og då genseren var ferdig, var ho vakkert styla for skitur! 

Sjå berre på dette fine vinterfotoet av Ann Mari, som eg har fått låne av dottera Marita Bett Aakre. Marita driv no Bakketunet på Bjørke i Ørsta, der Kristin Elise fann genseren då ho hadde utstilling der for fleire år sidan. Marita kan fortelje at namna på dei europeiske byane vart brodert på seinare av den same Ann Mari, men då torde ho heller ikkje å bruke genseren sin meir ...

Men omtrent seksti år seinare møtte altså desse gamle trådane min Gullfugl anno 2015, begge plagga i gult og brunt og med speglande, runde former. Og rykta fortel at det blir fleire flygeturar (les: visningar) av dette paret i framtida.

Vinn garn til Gullfuglen: Inspirert av alle dei flygande trådane i denne historia, vil eg no dele ut tre nøste av originalgarnet som eg brukte då eg laga Gullfuglen til boka, nemleg Shetland Soft frå Malsen og Mor (sjå fotoet over), med fargenamna "Kaffe" og "Solskinn". Det er ikkje mange gram som trengst til desse fjørlette vottane, så den som vinn, får også mykje til overs til andre prosjekt. 

Har du lyst å vere med i trekninga, kan du leggje igjen éin kommentar under innlegget her. Skriv også gjerne kva du strikkar/planlegg akkurat no. Fristen er: laurdag 14. november ved midnatt (dvs før søndagen startar). 

OPPDATERING (15. nov): Gratulerer, Siri! Trekninga viser at det er du som får Gullfugl-garnpakken frå meg. Du skreiv: "Fiiiine, fiiiiine vottene!! Akkurat nå strikkes det en restegarn genser til ei lita frøkenstrøken :)" Dei tre nøsta kjem flygande til deg så snart eg får postadressa di. E-posten min er frida.fielding(AT)yahoo.com

Foto: Hilde Lorentzen (copyright). Modell: Hedda

Fleire lenker:
På Facebook-sida til Kristin E. Halkjelsvik/Makeløs 

kan du sjå og lese meir om visninga i Oslo 31, oktober (innlegg 7. nov.)

Eit portrett av henne og firmaet Makeløs kan du lese her, 

hos Tusenideer.no. På same nettside står også ein stor reportasje om handarbeidstreffet som visninga var ein del av. 

På Raverly kan du sjå modellvottane til catwalken, strikka av  Liv M. Fostervold.  
og også her på bloggen hennar.

Foto & styling av Gullfuglen: Kristin Elise Halkjelsvik

PÅ FUGLEJAKT - to catch a bird while knitting

Hausten kjem alltid med eit visst vemod, synest eg, ikkje minst når trekkfuglane flaksar forbi høgt der oppe på himmelen, på veg sørover.

Men då er det ikkje anna å gjere enn å finne fram garn og pinnar, og prøve å fange ein fugl eller to - i maskene! 

Eventyrfuglane mine frå babyvottane Tommelise (og Grantreet) er no sanneleg landa på ei hue.

Eg gjentok rett og slett vottediagrammet nokre gonger rundt "skallen", og dermed vart det eit passande hue-mønster. 

Å vere med i Vottelauget byr på mange gleder, ikkje minst at mjuke, herlege gåver plutseleg hamnar i fanget mitt. Dette fine, handfarga garnet frå Edinburgh hadde Ann med til oppvarminga vår før hagefesten hos Aschehoug i august. Sjølvsagt ville eg då strikke noko som er inspirert av boka vår!

Fleire har spurt meg kva slags fugleart eg eigentleg har laga. Vel, første gong fuglen dukka opp var på tommelen på Grantreet. Då tenkte eg på ei svale, fordi H. C. Andersen skriv at treet snakkar med svalene om våren.

 I eventyret om Tommelise er det også ei svale, som blir redda av Tommelise, og dei legg ut på ei luftig reise i lag. Men biologien har eg tolka temmeleg fritt, så det beste namnet er nok ein eventyrfugl.

Inspirasjonen kom frå fleire kantar, men ikkje minst frå tomlane på fuglevottane i den danske boka "Strik med nordisk tradition" av Vibeke Lind (1981, nyopptrykk 2013). Verkeleg ei skattkiste! 

Så, kva blir neste kapittel, skal tru ... Eit eventyrfugl-skjerf, kanskje?

HAVBLÅ VINNARAR, LYSEGRØNT HÅP

Trekninga av Tommelise-garnet er over, og tilfeldigvis vart det havblått til begge vinnarane. 

No har eg nøsta opp silkeulla (... pluss eit nøste kvit merinoull til kvar), slik at det skal vere rikeleg til å strikke eit par Tommelise-vottar, også om ein doblar garnet for å få større vottar.

Når eg går til posten med garnet, kjem eg også til å sende ein tredje pakke avgarde: Nemleg vottane med grøne fuglar på (strikka i Cheeky Merino Joy). Desse går til den nystarta Facebook-gruppa "Strikk til flyktninger". Ei bokstaveleg tala bittelita gåve, men eg håpar ho kan varme små hender i vinter.

Dei to som vinn ein havblå Tommelise-garnpakke er nr. 8: Aashild Leithe Hetland, som skreiv: "Silkeull, den høres så god ut! Har aldri prøvd dette garnet."

Og nr 50: Solveig/Made by Solis: Votteboka står på ønskelisten ... Elle melle deg fortelle vanskelig å velge her, men jeg ender nok på Silkeull. Nytt garn for meg som jeg veldig gjerne skulle prøvd ut. Nå x-jeg strikkepinnene og venter i spenning :-)

Hurra og gratulerer! Og til alle de andre: Hjarteleg for innsatsen og fine kommentarar. Spennande å lese!  Å dele ut garnpakkar er moro, så det blir nok fleire sjansar utover hausten.

PS: No treng eg altså postadressa til Aashild og Solveig slik at garnet landar på rett stad: 

De kan bruke e-postadressa mi frida.fielding(krøllalfa)yahoo.com  Oppdatering: Begge vinnarane har tatt kontakt!

Trekninga er gjort på nett, med hjelp av random number generator. 

FLYGANDE GARN TIL DEG?

Skal du vere med på fugle-samstrikkinga som vi i Vottelauget arrangerer no i september? Eller har du berre lyst på nokre gram fjørlett og mjukt garn? 

Eg deler ut to små spesialpakkar ("kits") med garnnøste som kan passe til å strikke minst eitt par av babyvottane mine, Tommelise. Denne oppskrifta finn du i boka Eventyrvotter som nettopp er publisert (yeah!) 

Om du vil vere med på trekninga, skriv ein kommentar her under innlegget, der du seier kva garn du har mest lyst på (og gjerne også kvifor): 

a) Cheeky Merino Joy i fargen  "Cerise Ombré", handfarga av Ninapetrina. 
b) Silkeull frå Nøstebarn i fargen havblå, eller 
c) Huldra kamgarn frå Hifa i brunt. 

Tommelise strikka i Silkeull frå Nøstebarn 
(.. med herrevotten "Bjørnen og ulven" til høgre)

I begge pakkane kjem eg også til å putte oppi eit like stort nøste i kontrastfargen kvit/natur. 

Desse vottane er kjappe å strikke, ikkje minst fordi dei er utan tommel.

Istadenfor det litt tidkrevjande havskummønsteret på mansjetten, kan du også velje vanleg vrangbord. 

Tommelise strikka i Huldra kamgarn

Sjølv har eg strikka Tommelise-vottane med alle desse tre garntypane, og tilrår dei alle varmt i oppskrifta. a) har eg strikka i størrelsen "3-6 mnd", medan dei tynnare typane b) og c) vart "nyfødd". 

Men kor store vottane blir, er sjølvsagt også avhengig av di personlege strikkefastheit.

Fristen er temmeleg kort: Onsdag 2. september ved midnatt må kommentaren vere lagt inn her. Torsdag (3. september) kunngjer eg dei to vinnarane. Oppdatering: Trekninga er utført, sjå innlegget over.

Lukke til i svevet! 

"Det er betre med ein fuglevott i handa, enn ti garnnøste i skapet ..."

I septembersamstrikkinga er fuglar temaet.
Du kan strikke babyvottane Tommelise (her på fotoet i Rauma Finull),  Gullfuglen, Nattergalen eller eventuelt Grantreet, der eg har plassert eventyrfuglen på kvar tommel. 

GRØN BARNDOM - green nostalgia

Ei lita jakt er i gang: Har dette mønsteret eit namn, skal tru?  Eg har vore på mørkeloftet og rista støvet av to matchande barnejakker. Litt holete og stive, men likevel gode å ha på skogstur i vårsola.

Den grøne, avdempa fargen fyller meg med nostalgi, og etter å ha leita ei god stund fann eg eit familiefoto frå ca 1965 med desse to koftene som 17.mai-antrekk på to stolte brør. Så mønsteret må altså minst vere 50 år gammalt. Er det nokon som veit meir? Eg ventar spent!

Oppdatert same kveld: Hurra for Koftegruppa på Facebook! Då eg la ut spørsmålet der inne, varte det ikkje lenge før eg fekk løysinga på gåta: Mønsteret heiter "Jan k 812" og er frå  Sandnes kamgarn spinneri. Originalen er altså i heilt andre fargar! (Foto: skjermdump). Men skal tru kva år dette mønsteret kom ut? Eg nøstar vidare ...

HALVVEGS TIL SHETLAND - My first Baa-ble hats

Det er så godt når folk deler! Plutseleg har eg fått ein haug med stilige sauer i huset, takka vere Donna Smith på Shetland. 

Gratis-mønsteret hennar, "Baa-ble hat" (for Shetland Wool Week) har poppa opp i ulike variantar på nettet dei siste vekene, og sjølvsagt måtte eg og Silkesauen også vere med på dansen: 

"Sauer på vårbeite" og "Sauer i solnedgang" vart resultatet, og eg har allereie planar om éi hue til. Toppen på den raude vart nemleg litt for mykje jordbær, og litt for lite solnedgang etter min smak ...

Eg har aldri vore på Shetland, men no kjenner eg at eg har kome eit lite hopp nærare. Kanskje skal eg lage eit Baa-ble-skjerf også ...?

Fleire detaljar om huene finn du på Raverly-sida mi.
Dei søte 25 grams nøsta i shetlandsk saueull er perfekte til slike små prosjekt 
(... pluss at eg sneik inn litt Finull frå Rauma i sjølve sauemønsteret). 

OG PÅSKA VARER HEILT TIL SOMMARDAGEN

Snøen har regna vekk, men enno er det godteri i påskeegget, og harane ynglar som berre det! 

Alt eg rakk å strikke denne påska var nemleg barnevottane "Harehopp", det vil seie ein nylaga variant av Reveenka-mønsteret mitt. Rovdyra måtte altså bli igjen i skogen denne gongen, for at harane kunne hoppe fritt omkring på strikketyet.

Og du veit vel at du kan feire påske ei lita veke til ...? Den ortodokse påska er nemleg éi veke seinare enn den norske i år. Og ikkje minst: Påskevottstrikk-konkurransen i regi av oss i Vottelauget har frist heilt til 14. april, altså samtidig med den første sommardagen! Har du ein primstav i huset, er dette den magiske datoen då du kan snu primstaven frå vinterside til sommarside. 

Har du lyst til å bli med på innspurten? 
Les meir om påskevottstrikk-konkurransen på fellesbloggen til Vottelauget. Og her på Facebook-sida til Torirot kan du sjå foto og kome med heia-rop etter kvart som bidraga tikkar inn!

Årets påskestrikk for meg:
Barnevottane "Harehopp",
etter mi eiga oppskrifta
"Haren og reven".
Garn: Pickles Pure Wool.
Fleire strikkefakta finn du på prosjektsida "Harehopp" på Raverly.  

SKOGFEENS SKJERF - Scarf for big & small fairies

Verken snøstorm eller ørkensand kan vel stoppe meg! For no har eg strikka meg verdas mjukaste og finaste (... og lengste?) sjal - som faktisk også kan tryllast om til ein turban. I alle fall for 7-åringen min, som gjerne tok rolla som tuareg i dag.

Det fine mønsteret er henta frå vottane "Skogfeens hage" av Tori Seierstad, og dei same blomstrane er også å finne på genseren hennar "Tuin", som betyr hage på nederlandsk. 

Symbolsk nok starta eg på dette skjerfet nyttårsaftan, med den mørkeblå garnfargen kalla "Nattehimmel", og gjekk vidare med mønsterfargen "Edelweiss" i januar. No har eg lyst på å strikke vottane også så klart, og rotar rundt i garnkorgene på leiting etter ei ny og fin eventyrblanding! 

Strikke-fakta: 

Skogfeens skjerf

av Frida Engeset

etter votteoppskrifta "Skogfeens hage" av Tori Seierstad,

frå e-boka "Flere votter fra eventyrskogen".

Garn: "Cheeky Merino Joy" frå Rosy Green Wool 
(økologisk farga merinoull)

Fleire detaljar på prosjektsida mi på Raverly.

EIN SKATT TIL DEG I SKOGEN? - treasures in the fairy forest?

 Så reiste dei i lang tid og gjennom mange land, og kongsdottera visste slett ikkje kvar det bar av, men langt  om lenge kom dei til ein gullskog. Han var så gild at gullet draup av han, og tre og greiner og blomar og blad var av berre gull. (frå eventyret Kari Trestakk)

Her som eg skal feire jul i år, er det ikkje eit einaste snøfnugg i sikte. Men trøysta er då at nokre av trea enno viser seg i fine, gylne haustfargar.

Dei to nyaste vottemønstera mine er ei helsing til magiske vekster: Grantreet (etter historia til H. C. Andersen) og Eventyrlauv, som begge er med den nye e-boka "Flere votter fra eventyrskogen".

Oppdatert 21. des: På fellesbloggen til Vottelauget kan du sjå fleire foto, og lese meir om Eventyrlauv-mønsteret. 

Der står det også kven som fekk det ferdigstrikka Eventyrlauv-paret, pluss to andre vottar som eg gav vekk i førjulsgåve.

FRISLEPP AV REV - Mrs Fox and her mitten family

Det er så moro å sjå dei ulike variantane av mønsteret mitt Reveenka - som dukkar opp både på Raverly, på bloggar og i e-postkassa mi, og her har eg laga ein virtuell adventskrans med nokre av dei (med originalane mine midt i). Hjarteleg takk til alle for lån av foto!

Samtidig kan eg røpe at vi i Vottelauget rugar på ei heilt ny e-bok, "Flere votter fra eventyrskogen", og går alt etter planen, publiserer vi denne allereie no på tysdag 16. desember. Har du lyst til å vinne eit eksemplar, kan du gå inn på fellesbloggen vår og kommentere - der ser du også eitt av dei to nye vottemønstera mine, og kan gjette på eventyr!

MOLTER & MISTELTEIN cloudberry & misteltoe-mittens

No er eg klar for julekvelden - nesten! Med desse nystrikka vottane har eg både molter (som er min favorittdessert i jula), og misteltein.

Eg har nemleg leika meg med eigne fargar med utgangspunkt i Blåbærskogen av Wenche Roald. Endeleg fekk eg også tid til å prøve meg på dette fine mønsteret, lenge etter vi i  Vottelauget fekk sjå det første utkastet i sommar.

Oppskrifta står i e-boka vår "Votter fra eventyrskogen", og no i helga publiserte vi også den engelske versjonen (eit lite julegåvetips her, ja!) - og der heiter mønsteret Blueberry land. 

Og no har eg fått smaken på endå fleire moltevottar! Men eg er på jakt etter "den ultimate moltefargen". Har nokon eit godt tips ...? "Okergult" i Ask Hifa er ein fin farge, men er  litt for lys og solskinnsgul til å vere molte, synest eg. Eg har funne eit lite, knalloransje nøste med mohairgarn frå Pickles/Telespinn - kanskje blir dette ein del av neste moltevott? Eller kanskje soppfarga finsk sauegarn frå Riihivilla kan vere noko?

Strikkefakta, Moltevott & Mistelteinvott:

etter oppskrifta: "Blåbærskogen" av Wenche Roald (Raverly)

garn: Ask/Hifa 2

pinnar, Moltevott: 3 mm

pinnar, Mistelteinvott: 3,5 mm

størrelse: Dame medium

fleire detaljar: 

Sjå prosjektsida min på Raverly

LYSANDE MASKER - shining stitches

Kven er det som sit der inne i varmen, medan snøfnugga dansar utanfor? Då eg bladde over til november i Kittelsen-kalenderen min, kom dette lysande biletet fram. Desse fargane ville eg også fange inn, i masker!

Og sanneleg: I fargepaletten til Holst Garn (Supersoft) var det full match med Kittelsen. Men istadenfor å strø endå meir pengar ut på nytt garn, bestemte eg meg for ta av Shetland-nøsta som allereie fanst i huset: "Marsipan" og "Brandy" frå Malsen og Mor, og "Coffee" frå Holst Garn  - litt av ein mektig mix å setje fram på bordet!

Og her er mørketid-skjerfet mitt, sånn cirka halvvegs. Eg hadde eigentleg planlagt eit enkelt skjerf med berre éin mønsterbord nedst på kvar side, og lettstrikka lus/snøfnugg på resten. 

Men det var så moro å prøve ulike variantar av mønsterborden, og då oppdage at både blomster, lauv og sommarfuglar kom fram, alt etter samansetjinga. Fargen Marsipan såg f.eks. temmeleg blass og beskjeden ut åleine, men på ein botn av mørkebrun kaffi lyser han verkeleg opp. 

Så kjære, lange mørketid: Istadenfor å forbanne deg, omfamnar eg deg med dette vesle skjerfet. Og vonlegvis blir det ferdigstrikka før våren kjem!

Merknad: 

Biletet "November" frå Aarets Maaneder (1890) av Theodor Kittelsen 

er henta frå wikiart.org (public domain)

VOTT OG SINGELLIV - single mittens

Finst det ei moralsk lov som seier at vottar passar best som par? I tilfelle er eg ein notorisk lovbrytar. Eg går skamlaust rundt i byen med umake vottar, og no er dette syndige livet faktisk i ferd med å bli ein vane - som eg likar!

Kva med deg? Har du mange single vottar i skapet? 

Eg unnskyldar meg med at eg er ein del av "Eventyrlige votter"-teamet, der vi har teststrikka og eksperimentert både dag og natt. Då er pliktstrikk av vott nr 2 den store bøygen, for det er så moro å berre leike vidare, med andre fargar og nye garnsortar! 

Difor må eg innrømme at barnevottane "Bukkene Bruse", som eg teststrikka for Knitnetty/Wenche Roald, enno ikkje har fått matchande partnerar. Men eg var smart nok til å strikke éin høgrevott, og éin venstrevott, difor kan dei faktisk brukast allereie no, med hopp og sprett! 

Og dette er også mitt beste vottestrikk-tips: Gidd du ikkje å strikke ein maken vott med det same, så strikk i alle fall den neste for motsett hand! Vips, så har du eit vottepar klart når vinteren kjem.

Og Nøkken i blå lamull ser faktisk temmeleg fornøgd ut, sjølv om partneren er blodraud og full av hårete alpakka? 

Desse barnevottane teststrikka eg for Monstermønster/Merete Jansvik Toft, og å kunne spreie lusa fritt og uhemma som her, var herleg frigjerande! Slik blir faktisk ingen Nøkken-vott lik dei andre, uansett.

Og kva med desse tre single Reveenka-vottane i Tumi? Får dei nokon gong møte tvillingsjelene si, skal tru ...? PS: På prosjektsida til Reveenka på Raverly står fleire fakta om desse tre nye variantane mine.

Oppdatert 18. november: Det kan faktisk også lønne seg å strikke single vottar! Vi i Vottelauget delte impulsivt ut singelvott-prisen som ein av ekstrapremiane i den eventyrlege konkurransen vår, berre sjå her. (Og, ja - eg var med i juryen :-) Og her er blogginnlegget til Babben/Barbro, som vann denne prisen med ein vakker og lilla "Eventyrblomster"-vott!