TRØFFEL-HELT - in granddad's style

Ein liten og barsk bestefar på 2 år dansar for tida rundt i fargane "Truffle" og "Robins egg". For no har eg endeleg fullført ei lenge etterlengta oppgåve: å strikke Bestefarstrøya frå Nøstebarn. Som de ser måtte vi telje på knappane ... men til slutt landa vi på noko som eg synest passa til den rustikke stilen på trøya: Bøffelhorn. So beware of the wild one!

Då eg var midtvegs på bolen hadde eg ein strikkefagleg nedtur...: Maskene såg stygge og ujamne ut, Højlands-garnet kjendest hardt og sprøtt, og Truffle-fargen verka så trist og "støvete". Men så kom den herlege raglan-fellinga! Ermane og bolen samlar seg på same pinne, og plutseleg ser eg enden på det heile, ikkje minst når den strålande blåfargen rammar inn alle trøffel-maskene. "Robins egg" har eg forresten brukt tidlegare også, i Vinterhimmel-jakka. 

Ja, oppskrifta er fin, men sjølvsagt blir det meir pirke-arbeid med knappestolpe enn med vanleg, lukka hals. Eg stod også fast med halsfellinga ei stund før det løyste seg. Faktisk hadde det ramla ut ei setning frå oppskrifta, og då eg las rettinga, vart alt litt klarare, i alle fall for meg. Korrekturen for Nøstebarn-boka fann eg hos Monstermønster (under "Mønsterhjelp" i stolpen til høgre).  

Og etter vask (og forsiktig blokking) vart plagget så mykje mjukare og jamnare! Og då eg betrakta mini-bestefar der han sprang ut i septemberdagen, var eg rett og slett berre fornøgd: Plagget har eit stilig snitt, og dette blir ein fin og praktisk haustgenser både ute og inne: Lett og tynn, men varm - og i fargar som tåler skit og sølevatn ... og vilt pianospel hos den vesle venninna hans :-)

Neste gong har eg lyst å prøve ein meir "luksuriøs" versjon av denne trøya, gjerne i silkeull frå Nøstegarn. Tilsvarande fargar kunne f eks vere den fine nye Mokka-fargen, saman med Dueblå. Ein motsett farge-variant til storebror har eg også lyst til å lage, altså (Due)blått som hovudfarge, og Mokka/brunt som kant-farge.

oppskrift:

Bestefarstrøye i 2-tråds garn 

frå boka "Strikk til Nøstebarn" av Kathrine Gregersen
(i boka står det Bestefartrøye, altså utan "s")

storleik: 2 år

garn:

Isager Højlandsgarn (100 % lammeull frå Skottland)

50 gr - 280 meter

fargar: 

Truffle (brukte 66 gram) og Robins egg (brukte 13 gram)

pinnar: 2,5 og 3 mm
knappar: bøffelhorn

VESKE-TILFØRSEL - baggy bags

Eg klarte ikkje å snu ryggen til det sommarlege bomullsgarnet mitt! Dei tre dessert-fuglane inspirerte meg til å strikke vidare frå Pickles-haugen, og resultatet vart, hm, ikkje akkurat Prada, men to sjarmerande og praktiske vesker. 

Den største, døypt "Sjøsprøyt" (til høgre, etter fargane sjøvann og surf), passar perfekt til å henge på ei barnevogn, og elles stappe omtrent heile kvardagslivet oppi. Netting-mønsteret er utruleg stretsjy!

Den andre veska, "Pistasj & vanilje", passar til ein liten handletur, eller kanskje til draumar om ein fridag på grønt gras, med niste, strikkety og solbriller...

Mønsteret er frå den uttømmelege skattkista Raverly, og oppskrifta er glimrande til restegarn eller anna du ikkje heilt veit kva du skal gjere med: På "Sjøsprøyt"-veska let eg eit tynt lin-&ullgarn følgje med bomullen heile tida, og såleis kvitta eg meg med eit gammalt nøste frå lageret, samtidig som veska vart litt meir robust. 

Det er utruleg frigjerande å lage noko som ikkje treng å ha ein bestemt størrelse! 


Her er det berre å strikke i veg med det garnet du har, tjukt eller tynt, og stoppe når du er fornøgd. 


Neste gong har eg lyst til å lage ein mini-versjon av denne veska ved berre å bruke ein syltynn tråd, kanskje i silke?

oppskrift:

"Grrlfriend Market Bag" av Laura Spradlin (innlogging Raverly)

"Sjøsprøyt"-veska:

garn: Pickles Thin Organic Cotton

50 gr - 90 meter

fargar: 

til botnen og nettingen:

"sjøvann" (brukte ca 70 gr)

til kanten og stroppene: "pistasj" (brukte 24 gr)

...og heile tida strikka saman med ein tynn tråd av:

garn: Bouton d´Or "Savanne"

(70% ull, 30% lin)

farge: surf 

50 gr - 180 meter (brukte 63 gram)

(veska veg totalt 158 gram)

pinnar: 4 mm (truleg betre med 4,5 mm)

"Pistasj & vanilje"-veska:

garn: Pickles Thin Organic Cotton

50 gr - 90 meter (veska veg totalt 77 gram)

fargar: 

til botnen: pistasj (13 gram)

til nettingen og kanten: blek pistasj (45 gram)

til kanten og stroppen: vanilje (19 gram)

pinnar: 4 mm

In the beginning.... Oppskrifta startar i botnen på veska

FLYGANDE DESSERT - sweet birdies

Sommaren er i ferd med å vinke farvel  - og planane mine om å strikke lette, finstripete bomullsgensarar til dei små strandløvene mine, er utsett til neste år, trur eg ... Men når dei lyse trådane ligg der og lokkar, med solfylte namn som vanilje, villrose og pistasj, er det umuleg å leggje dei i vinterhi! 


Og det er betre med tre fuglar på fatet enn tre garnnøste i skapet, ikkje sant...? 

Desse flygande vesena vart kanskje litt rare og skeive, i ein fargepalett som er uvanleg sart og søt til å vere meg. Framande fuglar, rett og slett. 

Men spesielt den milde og gylne fargen vanilje vil eg gjerne skal vere med i garnsamlinga mi neste sommar også.  

Eg har ikkje bestemt meg om desse "is-kulene" er trekkfuglar, eller om dei skal få bli verande her i huset. Kanskje har dei mest lyst til å flyge til nokon som ventar på å bli fødd, i ein annan by, i eit anna land?

oppskrift: fantasi-fugl etter Susan B. Anderson

garn: Pickles Thin Organic Cotton (plantefarga)

50 gram - 90 m 

fargar: pistasj, vanilje og villrose

(eg brukte ca 20 gram av hovudfargen, 

og ca 5 gram av den andre)
... pluss Isager Højlandsgarn, farge "robins egg" til augene

fyll: ullflor

pinnar: 3 mm (normalt 4 mm)

TO TYNNE OG EIN TJUKK - thin stripes of sun

Kva gjer ein når ferie-strikket er pakka pent ned i bagasjen, men ein fryktar at garnet ikkje rekk? Eg slengde eit par tynne garnrestar på toppen av kofferten, og resultatet ser de her: 


Ei jakke med godt og tjukt 3-tråds-garn, "drøya" med striper i dobla 2-tråds restegarn.


Eg har døypt jakka Solstriper i brevatn, sidan eg synest den olivengrøne fargen nesten skiftar ham til gult i doblinga med breblå. Maske-magi! 


Nøstebarn-oppskrifta prøver eg her for første gong, og eg må innrømme at eg fekk litt startvanskar då eg oppdaga at den berre har éin størrelse og eitt garn oppgitt, nemleg for baby (ca 6 mnd) i 2-tråds tynn lammeull. Men eg ville gjerne lage ei slik jakke til to-åringen min, så hm, kva skulle eg gjere då? Sidan sommar-hjernen ikkje var heilt klar for matematikk valde eg ein ny, men enkel vri: eg strikka jakka i 3-tråds garn i staden for 2-tråds, og dermed også med tjukkare pinnar. Voilá, jakka passar perfekt! (...Ja, ho er endåtil litt for stor).


Original-oppskrifta foreslår heile tre ulike fargar i stripene, men eg valde altså heller ein mild "solstripe"-variant ved berre å lage éi enkelt farga stripe (dvs midt-stripa med 50 masker), i ein oppmjuka fargemix av 2-tråds restegarn i oliven blanda med grunnfargen breblå. 


Knappane er såkalla vintage, det vil seie gamle og slitte knappar (i tinn?) frå familiens knappeboks. Denne jakka er forresten mitt beskjedne bidrag til Sommarutfordringa på Nøstebloggen, der fristen går ut i dag.

oppskrift: 

"Babyjakke strikka i eitt stykke", 
frå boka Strikk til Nøstebarn av Kathrine Gregersen
her i min variant for større barn

garn: 

grunnfargen: 3-tråds breblå = nr 62 i Merinoull 
(300 m = 100 gr - eg brukte 130 gram) frå Nøstebarn

stripene: 2-tråds breblå dobla med 2-tråds lys oliven = nr 72 (600 m = 100 gr - eg brukte ca 13 gram av kvar)

pinne: 3,5 og 4 mm

VEGEN VIDARE - how to move on ...

Kva kan ein seie no, etter 22. juli? 
Etter desse forferdelege dagane? 


Eg må innrømme at eg har hatt problem med å koble meg på "pludre"-tonen i bloggverda igjen. Korleis kan vi gå vidare som om ingenting hadde hendt? 


Eg har berre klart å vere enkelt til stades i kvardagen. Setje pris på fellesskap. Og å glede meg ekstra over dei bråkete, slitsame og skrikete små-prinsane mine, fordi dei to er så levande, så levande. 


Begge er sommarbarn, og fekk i år kvar si heimelaga bursdagskrone - superrask å strikke. Kan også brukast som varmande panneband når stripa på gradestokken kryp ned mot null.  Men dét er vonlegvis lenge til... 


Oppskrifta (gratis) har det innsnevra namnet Pannebånd for påskeprinsesser, men her er mine sommarlege og blå variantar: 

mørkeblå krone i bomull: 
garn: Pickles organic cotton
farge: "sommernatt"
50 gr - 90 meter, brukte 14 gram (str ca 4 år)

pinne nr: 4 
la opp 10 masker istadenfor 15

lyseblå krone i merinoull: 
garn: Leine Merino

2-tråds, 50 gr - 175 m, handfarga av Nina Tigerstedt
brukte 13 gram (str ca 2 år)
pinne nr: 3

Eg synest det tynne garnet (ull) fungerte best, då kunne eg lage fleire taggar, og dét ser finast ut, spør du meg. Ullkrona held seg også betre i fasongen enn bomullskrona, som fort utvida seg og vart levjete. Kanskje kan eg prøve å strikke eller sy inn ein elastisk tråd neste gong, for ei stretsjy bomulls-krone.

Utøya og Oslo 22-07-2011

foto: Arvind Balaraman (freedigitalphotos.net)

Da synker våpnene
maktesløs ned!
Skaper vi menneskeverd
skaper vi fred.

Den som med høyre arm
bærer en byrde,
dyr og umistelig,
kan ikke myrde.

Dette er løftet vårt
fra bror til bror:
vi vil bli gode mot
menskenes jord.

Vi vil ta vare på
skjønnheten, varmen
som om vi bar et barn
varsomt på armen!

frå "Til Ungdommen" av Nordahl Grieg (1936)